Намояндаи доимии Ҷумҳурии Тоҷикистон дар СММ дар ҷаласаи Шӯрои амнияти СММ оид ба Афғонистон иштирок намуд

ДУШАНБЕ, 18.12.2018 /АМИТ «Ховар»/. 17 декабри соли 2018 Намояндаи доимии Ҷумҳурии Тоҷикистон дар  СММ Маҳмадамин Маҳмадаминов дар ҷаласаи Шӯрои Амнияти СММ, ки ба масъалаи Афғонистон бахшида шуда буд, ширкат ва суханронӣ намуд.

Тавре аз Вазорати корҳои хориҷии Ҷумҳурии Тоҷикистон ба АМИТ «Ховар» хабар доданд, М.Маҳмадаминов зимни суханронӣ мавқеи ҷумҳурии моро оид ба Афғонистон иброз намуда,  зарурати пиёдасозии амалҳои ҳамоҳангшуда ва таҳкими ҳамкории минтақавиро нисбат ба масъалаҳои таъмини рушду шукуфоӣ дар минтақа таъкид сохт.

Намояндаи доимии Тоҷикистон ҳамчунин аз таҳдиду чолишҳои марбута, бахусус терроризм, ҷиноятҳои муташаккили фаромарзӣ ва қочоқи ғайриқонунии маводи мухаддир ёдрас гардида, таъкид намуд, ки Тоҷикистон ҳамеша омодаи ҳамкорӣ ва кумак ҷиҳати истиқрори сулҳу субот дар Афғонистон мебошад.