Паҳлавонони ҷавони тоҷик дар Сербия соҳиби ду медал гардиданд

ДУШАНБЕ, 10.12.2018 /АМИТ «Ховар»/. Ду паҳлавони ҷавони  тоҷик- Разавӣ Навбаҳоров  ва Шаҳром Шералиев дар доираи Чемпионати ҷаҳон оид ба самбо миёни донишҷӯён, ки дар шаҳри Новий Сади Сербия доир гардид,  яке   дар вазни 57 кг ва дигаре  дар вазни 82 кг сазовори  медал гардиданд. Дар ин бора корманди  Федератсияи дзюдои Тоҷикистон Маҳмуди Абдулло  ба мухбири АМИТ «Ховар»  аз макони мусобиқа хабар дод.

Зикр шуд, ки дар ин мусобиқа Разавӣ Навбаҳоров дар даври аввал озод буд ва баъдан рақиби ҳиндаш Кумар ва мизбон Дишковичро мағлуб карда, ба қисмати финалӣ баромад. Дар қисмати ниҳоӣ аз ҳарифи русаш Пеничник мағлуб шуда, медали нуқра ба даст овард.

Шаҳром Шералиев даври аввалро озод гузашта, бо як пирӯзӣ бар варзишгари немис Гертсен ба қисмати нимфиналӣ баромад. Вале  дар ин давр аз паҳлавони  россиягӣ мағлуб шуда, ба медали биринҷӣ сазовор гардид.