Дар Душанбе нақши институти оиладории миллӣ дар раванди бархӯрди тамаддунҳо баррасӣ гардид

ДУШАНБЕ, 25.01.2018. /АМИТ «Ховар»/. Имрӯз дар муассисаи давлатии «Душанбе – Плаза» бо ташаббуси Мақомоти иҷроияи ҳокимияти давлатии шаҳри Душанбе дар мавзӯи «Нақши институти оиладории миллӣ дар раванди бархӯрди тамаддунҳо» конферонсия баргузор гардид.

Тавре мухбири АМИТ «Ховар»  иттилоъ медиҳад, дар он муовини Раиси шаҳр Мавсума Муинӣ, муовини Вазири фарҳанги Ҷумҳурии Тоҷикистон Зевар Давлатзода, муовини якуми Раиси Кумитаи кор бо занон ва  оилаи назди Ҳукумати Ҷумҳурии Тоҷикистон Марҳабо Олимӣ ва дигарон иштирок намуданд.

Зикр шуд, ки мақсад аз баргузории конференсия  баланд бардоштани маърифати оиладорӣ, устувор гардонидани мавқеи оила дар ҷомеа, тақвият бахшидани масъулияти волидайн дар таълиму тарбияи фарзанд, тарғиби тарзи ҳаёти солим, муносибати хуби дуҷониба дар хонавода ва эҳтироми волидайн аз ҷониби навхонадорон мебошад.

Бояд гуфт, ки аз рӯзҳои аввали соҳибистиқлолии мамлакат  Ҳукумати Ҷумҳурии Тоҷикистон таҳти роҳбарии Сарвари давлат муҳтарам Эмомалӣ Раҳмон вобаста ба масъалаҳои оила, дастгирии он ва таҳкими муносибатҳои оилавӣ тадбирҳои зиёди судманд андешида, онҳоро дар амал татбиқ намуд. Маҳз бо назардошти нақши муҳими ин ниҳоди ҷамъиятӣ Пешвои миллат муҳтарам Эмомалӣ Раҳмон   соли 2015-ро Соли оила эълон намуданд.

Зикр шуд, ки Конститутсияи Ҷумҳурии Тоҷикистон оиларо ҳамчун  узви асосии ҷомеа муайян намуда, дар баробари он дар мамлакат даҳҳо санадҳои меъёрию ҳуқуқии вобаста ба оила амал мекунанд, ки ба рушд ва таҳкими он, пешгирии зӯроварӣ дар оила ва ҳифз намудани  ҳуқуқҳои аъзои оила равона гардидаанд.

«Қабули Консепсияи рушди оила дар Ҷумҳурии Тоҷикистон ифодакунандаи ҳолати кунунӣ ва дурнамои сиёсати давлатӣ дар самти таҳкими мақоми оила мебошад. Асоси ин  ҳуҷҷати муҳимро, ки оила дар он ҳамчун ниҳоди иҷтимоӣ ва макони тарбияи фарзанд эътироф гардидааст, баланд бардоштани маърифати оиладорӣ, солимии занон ва маҷмӯи оила ташкил медиҳад», — иброз дошт муовини Раиси шаҳри Душанбе Мавсума Муинӣ.

Санадҳои меъёриву ҳуқуқии дигаре, ки ба ин ниҳод вобастагӣ доранд,  ва кафолати баробарии воқеии мардону занон, пешгирии зӯроварӣ дар оила дар Ҷумҳурии Тоҷикистонро таъмин менамоянд, қонунҳои Ҷумҳурии Тоҷикистон «Дар бораи кафолатҳои давлатии баробарҳуқуқии мардону занон ва имкониятҳои баробари амалигардонии онҳо», «Дар бораи пешгирии зўроварӣ дар оила» ва дигарҳо мебошанд.

Гуфта шуд, ки мутаассифона, масъалаи бекоршавии ақди никоҳ миёни оилаҳои ҷавон  дар шаҳри Душанбе сабаби ташвиш гардидааст. Дар 11 моҳи соли 2018  1327 ҳолати ҷудошавии оилаҳои ҷавон ба қайд гирифта шудааст, ки дар муқоиса ба ҳамин давраи соли 2017 158 ҳолат  зиёд мебошад. Чуноне аз таҳлилҳо бармеояд, сабаби асосии ҷудошавии оилаҳои ҷавон- ин омода набудани навхонадорон  ба ҳаёти мустақилона, фарзанддор нашудан, мувофиқ наомадани хислати келин ба хушдоман ва ё баръакси он,  майзадагӣ,  нашъамандӣ ва ғайраҳо мебошанд.

Зимнан, оила дар фарҳанги миллати куҳанбунёди тоҷик ҳамчун ниҳоди муқаддас эътироф шуда, беҳтарин арзишҳои инсонӣ, аз қабили муҳаббату садоқат, самимияту вафодорӣ ва ҳамдигарфаҳмиву таҳаммулгароӣ маҳз дар он ташаккул меёбанд.

-Аз ин хотир, — гуфт Марҳабо Олимӣ, — ташкили оилаи солиму намунавӣ аз тарбияи фарзанд вобастагии зиёд дошта, дар ин масъала ҷомеаро зарур аст, ки  масъулияти бештар зоҳир намоянд.

«Зеро дар замони зудтағйирёбанда ва раванди бархӯрди тамаддунҳо  танҳо дар заминаи тарбияи дурусти фарзандон ва омода кардани онҳо ба зиндагии мустақилона метавон ба ташкили оила ва ҷомеаи солим даст ёфт», — илова намуд номбурда.

Ёдовар мешавем, ки пас аз анҷоми конференсия озмуни фарҳангӣ-маърифатии «Нақши оила дар Соли рушди сайёҳӣ ва ҳунарҳои мардумӣ» дар соли 2018 ҷамъбаст гардида, ғолибон бо ифтихорномаҳо сарфароз гардонида шуданд.

Инчунин Мавсума Муинӣ ва дигар шахсони масъул ба ду нафар оилаи ҷавон шаҳодатномаи ақди никоҳ ва туҳфаҳои хотиравӣ тақдим намуданд.