Даргузашти собиқ сармураббии дастаи «Помир» (Душанбе) Иштван Секеч
![](https://khovar.tj/wp-content/uploads/2019/01/11-2.jpg)
ДУШАНБЕ, 29.01.2019. /АМИТ «Ховар»/. Дирӯз, 28 январ, қалби собиқ футболбоз ва мураббӣ Иштван Йожефович Секеч аз тапидан бозмонд. Дар ин бора мухбири АМИТ «Ховар» хабар медиҳад.
Ӯ 79 сол дошт. Сокини Береговои Венгрия пас аз хатми мактаби миёна дар ҳайати дастаи «Спартак»-и Ужгороди Украина ҳунарнамоиро оғоз намуд. Баъдан дар ҳайати дастаи дуюми «Динамо»-и Киев ҳунарнамоиашро идома дод. Илова бар ин, Секеч дар ҳайати дастаҳои «Авангард»-ҳои Тернопол ва Харков, дастаҳои артиши Лвов ва Одесса, «ССКА»-и Москва ва «Черноморетс»-и Одесса бозидааст.
Ӯ дар ҷаҳони футбол шахсияти то як дараҷа шинохта аст.
«Ӯ чусту чолок ва аз ҷиҳати физикӣ пурқувват буда, аз паси худ шариконашро пеш мебурд», — гуфта мешавад дар Энсиклопедия оид ба футбол дар бораи Иштван Секеч.
Ҳамчунин дар энсиклопедия гуфта мешавад, ки Секеч яке аз мураббиёни барҷастаи футболи шӯравии солҳои 70-ум ва 80-ум буда, дорои қобилияти муттаҳид кардани бозингарон, ҳидоят намудани онҳо барои расидан ба ҳадафҳои баланд ва ҷалб сохтани ҷавонони боистеъдод ба даста мебошад.
Иштван Секеч ягона мураббиест, ки сазовори унвони Мураббии шоистаи Тоҷикистон, Россия ва Ӯзбекистон гардидааст.
Иштван Секеч 5 сол (1973-1978) сармураббии дастаи «Помир»-и Душанбе ва баъдан «Карпат»-и Лвов буд. Пас аз фоҷиае, ки соли 1979 бо дастаи «Пахтакор» рух дод, Секечро барои ташаккули ҳайати нав ба даста даъват карданд.
Дар бораи солҳои фаъолияташ дар Тоҷикистон дар солҳои 70-ум Иштван Секеч ба рӯзноманигорон чунин ибрози андеша карда буд:
«Дар Душанбе ман ба осонӣ фаъолият менамудам, зеро бовариро эҳсос мекардам. Дар чор бозии аввал мо ду маротиба бохтем ва ду маротибаи дигар мусовӣ бозидем, вале ман аз роҳбарият ягон калимаи ноҷо нашунидам. Мо ба хона омадем ва дар ҷои охирони ҷадвали мусобиқа қарор доштем. Раиси вақти Шӯрои Вазирони Ҷумҳурии Тоҷикистон Набиев тамоми дастаро ба назди худ даъват намуда, ба мо гуфт, ки оромона кор кунем ва дар бораи натиҷаҳо фикр накунем. Ӯ футболро мефаҳмид ва давоми омодагии пешазмавсимӣ кори пурмаҳсули моро дида буд. Натиҷа маътал накард».
Соли 1979 «Помир» соҳиби медали биринҷии чемпионати Лигаи якуми ИҶШС гардид.
Соли 2003 таҳти роҳбарии Секеч «Регар-ТадАЗ»-и шаҳри Турсунзода чемпиони Тоҷикистон гардид ва соли 2004 ӯ мураббӣ-машваратчии дастаи мунтахаби миллии Тоҷикистон буд. Соли 2006 Иштван Йожефович «ССКА»-и Душанберо роҳбарӣ намуд.