«Истиқлол» ба бозиҳои интихобии Лигаи чемпионҳои Осиё тайёр мешавад

ДУШАНБЕ, 04.01.2018. /АМИТ «Ховар»/. Клуби футболи «Истиқлол»-и Душанбе, ки бори аввал дар таърихи худ дар бозиҳои интихобии Лигаи чемпионҳои Осиё ширкат меварзад, давраи сеюми омодагиро дар варзишгоҳи марказии шаҳри Душанбе  оғоз кард.  Аловиддин Бӯриев гузориш медиҳад.

Дастаи «Истиқлол» –чемпиони ҳафткаратаи Тоҷикистон марҳилаи омодагиро ҳанӯз аз 10 декабри соли 2018 оғоз карда, то 30 декабр идома дод ва ҳоло бори дигар малакаю маҳорати худро такмил медиҳад. Ҳаким Фузайлов, сармураббии нави «Истиқлол» мехоҳад дастаеро созмон диҳад, ки табъи дил ҳунарнамоӣ кунаду вазифаҳои дар наздаш гузошташударо иҷро намояд.

КФ «Истиқлол» барои ба марҳилаи гурӯҳии Лигаи чемпионҳои Осиё шомил шудан 12 феврал сараввал бо дастаи АГМК-и Ӯзбекистон дар як вохӯрӣ, ки дар Алмалики Ӯзбекистон барпо мегардад, қувва месанҷад.

«Истиқлол» нақша дорад, ки давраи охирини тайёриро 22 январ дар кишвари Туркия барпо намояд. Легионерҳое, ки ба ҳайати даста даъват мешаванд, маҳз дар Туркия аз санҷиш хоҳанд гузашт. Вақте, ки мо ба тамрингоҳи даста ҳозир шудем, чанд нафар бозингарон аз клубҳои хориҷи дуру наздик аз муоинаи мураббиён мегузаштанд. Аз ҷумла, Манучеҳр ва Алишер Ҷалилов, ки яке соли гузашта дар Индонезия ва дигаре дар Россия ҳунарнамоӣ мекарданд, дар ин қатор ҳузур доштанд. Аз рӯи гуфти сармураббии даста Ҳаким Фузайлов, дарҳои КФ «Истиқлол» барои ҳамаи бозингарони беҳтарине, ки мехоҳанд дар ҳайати он ҳунарнамоӣ кунанд, кушода аст.

Ҳарифи нахустини истиқлолиҳо дар бозиҳои интихобии Лигаи чемпионҳои Осиё -дастаи АГМК-и Ӯзбекистон соли гузашта дар Чемпионати кишвари ҳамсоя зинаи 8-умро ишғол кард ва аз ҳисоби ғолибият дар Ҷоми Ӯзбекистон ҳуқуқи дар бозиҳои плей-оффи Лигаи чемпионҳои Осиё иштирок карданро пайдо намуд. Ба даста  Мирҷалол Қосимов машқ медиҳад.

Дар сурати пирӯзӣ дар вохӯрӣ бо дастаи АГМК дастпарварони Ҳаким Фузайлов дар марҳилаи плей-оффи дуввум бо клуби «Аннаср»-и   Арабистони Саудӣ рақобат хоҳанд кард.