Таъйиноти кадрӣ

Январь 28, 2019 16:22

ДУШАНБЕ, 28.01.2019 /АМИТ «Ховар»/. Имрӯз Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо натиҷагирӣ аз камбудиву норасоиҳои ҷиддӣ дар баъзе сохтору мақомоти давлатӣ, ки дар маҷлиси васеи Ҳукумати Ҷумҳурии Тоҷикистон иброз гардид, дар сатҳи роҳбарикунандаи сохторҳои Вазорати саноат ва технологияҳои нав, Вазорати энергетика ва захираҳои об, Вазорати молия, Кумитаи андози назди Ҳукумати Ҷумҳурии Тоҷикистон, Саридораи геологияи назди Ҳукумати Ҷумҳурии Тоҷикистон, ноҳияҳои Айнию Деваштичи вилояти Суғд, шаҳри Роғун, ноҳияи Шоҳмансури шаҳри Душанбе, инчунин дигар сохторҳои давлатӣ як қатор тағйироти кадрӣ ба амал оварданд.

Ёдовар мешавем, ки дар Паёми навбатии худ ба Маҷлиси Олӣ Президенти мамлакат бо мақсади аз кишвари аграрӣ ба як кишвари индустриалӣ табдил додани Тоҷикистон, бо дарназардошти афзоиши ҳиссаи саноат дар маҷмӯи маҳсулоти дохилӣ ва аҳаммияти соҳаи саноат дар ҳалли масъалаҳои иқтисодиву иҷтимоӣ, таъсиси ҷойҳои корӣ пешниҳод намуданд, ки саноатикунонии босуръати кишвар ҳадафи чоруми миллӣ эълон карда шавад.

Дар маҷлиси васеи ҳукумати кишвар, Сарвари давлат аз ҷой доштани баъзе камбудиҳо ва ба таври ғайриқаноатбахш амалӣ кардани ҳадафҳои саноатикунонии кишвар, изҳори нигаронӣ намуданд.

Тибқи таҳлили дар маҷлиси васеи Ҳукумати кишвар баррасӣ гардида, дар баробари пешравӣ камбудиҳои ҷиддӣ дар дигар сохторҳо низ ба назар расида, Президенти мамлакат пеш аз ҳама сатҳи баланди қонуншиканӣ дар самти тақсими ғайриқонунии замин дар як қатор шаҳру ноҳияҳои ҷумҳурӣ, иҷрои ғайриқаноатбахши уҳдадориҳои вазифавии раисони баъзе ноҳияҳо, таъмини нокифояи нақшаи баъзе намудҳои андоз, истифодаи ғайримақсадноки маблағҳои буҷетӣ ва дигар норасоиҳоро махсус қайд карданд.

Бинобар ҷой доштани камбудиҳо дар сохтор ва муассисаҳои зертобеи вазорати саноат ва технологияҳои нав ва Сарраёсати геологияи назди Ҳукумати Ҷумҳурии Тоҷикистон роҳбарияти ин сохторҳо бо муовинонашон аз вазифаҳояшон озод гардиданд.

Дар Қасри миллат Президенти мамлакат муҳтарам Эмомалӣ Раҳмон нафаронеро, ки ба вазифаҳои пурмасъул таъин шуданд, барои суҳбат ба ҳузур пазируфтанд. Бо фармонҳои Президенти Ҷумҳурии Тоҷикистон ва қарорҳои Ҳукумати Ҷумҳурии Тоҷикистон роҳбарият ва муовинони вазорати саноат ва технологияҳои нав, сардор ва муовинони Сарраёсати геологияи назди Ҳукумати Ҷумҳурии Тоҷикистон, муовини вазири энергетика ва захираҳои об, муовини вазири молия, раиси шаҳри Роғун, раисони ноҳияҳои Айнӣ ва Деваштичи вилояти Суғд, раиси ноҳияи Шоҳмансури пойтахт, директори Агентии содироти назди Ҳукумати Ҷумҳурии Тоҷикистон, директори Институти геология, сохтмони ба заминҷунбӣ тобовар ва сейсмологияи Академияи илмҳои Ҷумҳурии Тоҷикистон ва муовини Раиси Кумитаи андози назди Ҳукумати Ҷумҳурии Тоҷикистон, ба вазифаҳо таъин гардиданд.

Мавриди зикр аст, ки аксарияти кадрҳои ба вазифаҳо таъиншуда кадрҳои ҷавону корозмӯда, ботаҷриба ва донандаи хуби забонҳои хориҷӣ мебошанд.

Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон кадрҳоеро, ки ба вазифаҳои масъули роҳбарӣ таъйин гардиданд, ба хизмати софдилонаву поквиҷдонона ба нафъи давлату миллат ва дар доираи қонун иҷро намудани фаъолияти хизматӣ даъват намуданд.

Таъкид гардид, ки шахсони ба вазифаҳои пурмасъул таъиншуда, ба давлату Ватан ва миллат бо дасту дилу нияти пок кор кунанд, барои рушду пешрафти кишвар саҳмгузор ва баҳри иҷрои саривақтию босифати дастуру супоришҳои Ҳукумати Ҷумҳурии Тоҷикистон ташаббускору ташкилотчӣ бошанд.

Таъиноти кадрӣ 28.01.2019

Январь 28, 2019 16:22

Хабарҳои дигари ин бахш

Пешвои миллат Эмомалӣ Раҳмон пас аз анҷоми сафари корӣ дар Вилояти Мухтори Кӯҳистони Бадахшон ба шаҳри Душанбе баргаштанд
Президенти Ҷумҳурии Тоҷикистон Эмомалӣ Раҳмон бо роҳбарон ва фаъолони Вилояти Мухтори Кӯҳистони Бадахшон мулоқот намуданд
Суханронии Президенти Ҷумҳурии Тоҷикистон, Пешвои миллат Эмомалӣ Раҳмон дар мулоқот бо роҳбарон ва фаъолони Вилояти Мухтори Кӯҳистони Бадахшон
Президенти Ҷумҳурии Тоҷикистон Эмомалӣ Раҳмон дар шаҳри Хоруғ дар тантанаҳои идона ба ифтихори 28-солагии Рӯзи ваҳдати миллӣ иштирок намуданд
Суханронии Президенти Ҷумҳурии Тоҷикистон, Пешвои миллат Эмомалӣ Раҳмон ба ифтихори 28-солагии Рӯзи ваҳдати миллӣ
Сарвари давлат Эмомалӣ Раҳмон дар шаҳри Хоруғ бинои нави истиқоматии 5-ошёна барои хизматчиёни давлатиро мавриди истифода қарор доданд
Пешвои миллат Эмомалӣ Раҳмон дар ҳудуди Парки технологии шаҳри Хоруғ коргоҳҳои истеҳсолии маҳсулоти гӯштӣ ва обҳои табиии ташнашиканро ифтитоҳ намуданд
Президенти Ҷумҳурии Тоҷикистон Эмомалӣ Раҳмон дар шаҳри Хоруғ бо лоиҳаҳои биноҳои истиқоматӣ бо маркази хизматрасонию тиҷоратӣ, таваққуфгоҳи нақлиётӣ, меҳмонхона ва майдончаи варзишии кӯдакон шинос шуданд
Сарвари давлат Эмомалӣ Раҳмон дар шаҳри Хоруғ китобхонаи кӯдаконаи вилоятӣ, китобхонаи шаҳрии ба номи Ҳофизи Шерозӣ ва Маркази рушди зеҳни сунъиро ифтитоҳ намуданд
Пешвои миллат Эмомалӣ Раҳмон дар шаҳри Хоруғ Маркази фарҳангӣ, савдо ва Шурои иттифоқҳои касабаи вилоятро ифтитоҳ намуданд
Президенти Ҷумҳурии Тоҷикистон Эмомалӣ Раҳмон дар шаҳри Хоруғ чойхонаи Хатлонро ба истифода доданд
Сарвари давлат Эмомалӣ Раҳмон дар шаҳри Хоруғ пули мошингузарро мавриди баҳрабардорӣ қарор доданд