Ҳайати Парлумони Тоҷикистон ба Япония сафар намуд

ДУШАНБЕ, 4.03.2019. /АМИТ «Ховар»/.  Субҳи имрӯз гурӯҳи дӯстии парлумони Маҷлиси намояндагони Маҷлиси Олии Ҷумҳурии Тоҷикистон бо парлумони Япония ба Токио сафар намуд.

Тавре котиби матбуоти Маҷлиси намояндагон Муҳаммадато Султонов ба мухбири АМИТ «Ховар» иттилоъ дод, ҳайати мазкур бо роҳбарии Раиси кумитаи Маҷлиси намояндагон оид ба корҳои байналмилалӣ, иттиҳодияҳои ҷамъиятӣ ва иттилоот Олим Салимзода ба ин мамлакат рафт.

Ба иттилои манбаъ, сафари мазкур бо даъвати расмии Раиси палатаи поёнии Парлумони Япония Тадаморӣ Ошима сурат гирифт.

«Сафари ҳайати Парлумони Тоҷикистон то 6 марти соли равон идома ёфта, дар ин раванд мулоқоти дуҷонибаи ҳайатҳо ва дигар шахсони расмӣ, инчунин баргузории ҷаласаи кории гурӯҳи дӯстии байнипарлумонии ду мамлакат дар назар аст»,-илова намуд Муҳаммадато Султонов.

Мавриди зикр аст, ки ҳайати Парлумони Тоҷикистон аз шаҳрҳои Киото, Осака ва Ҳиросимо дидан намуда, бо ҳамватанони бурунмарзӣ — донишҷӯёни тоҷик, ки дар ин шаҳрҳо таҳсил менамоянд, мулоқот анҷом медиҳанд.