ҒАЛАБА МУБОРАК! «Хуҷанд» дар Ҷоми Конфедератсияи футболи Осиё ба даври навбатӣ роҳ ёфт

ДУШАНБЕ, 13.03.2019. /АМИТ «Ховар»/. Чанд лаҳза   пеш дар Варзишгоҳи «20- солагии Истиқлолияти Тоҷикистон»-и шаҳри Хуҷанд   бозии ҷавобии марҳилаи плей-оффи Ҷоми КФО-2019 байни дастаҳои футболи  «Хуҷанд»-и Тоҷикистон  ва «Аҳал»-и   Туркманистон баргузор гардид.  Ин вохӯри ҷолибу диданӣ  байни дастаҳо бо ҳисобӣ  мусовӣ 0:0 анҷом ёфт.

Тавре мухбири АМИТ «Ховар» Меҳрони Қурбон  хабар медиҳад, бозии аввали ин дастаҳо дар шаҳри Ашқобод як ҳафта пеш бо натиҷаи мусовӣ 1:1 ҷамъбаст гардида буд. Аз натиҷаи ду бозӣ дастаи  футболи «Хуҷанд»-и  Тоҷикистон ба даври навбатӣ роҳ ёфт.

Баъди ин ғолибит  дастаи футболи «Хуҷанд»-и  Тоҷикистон   роҳхати бозиҳои гурӯҳии Ҷоми КФО-2019-ро ба даст оварда, шомили гурӯҳи «Д»  гардид. Ёдовар мешавем, ки дар ин гурӯҳ  дастаҳои футболи «Истиқлол»-и Тоҷикистон, «Алтин Асир»-и Туркманистон ва «Дордой»-и Қирғизистон шомиланд.