БОЗОРИ ПУЛ ВА САРМОЯ. Дар Душанбе ташаккул ва инкишофи ин ҳардуро баррасӣ намуданд

ДУШАНБЕ, 15.03.2019/АМИТ «Ховар»/. Масъалаи  «Ташаккул ва инкишофи бозори пул ва бозори сармоя» зимни семинари амалӣ дар Душанбе  бо иқдоми Вазорати молияи Ҷумҳурии Тоҷикистон дар ҳамкорӣ бо Бонки аврупоии таҷдид ва рушд (БАТР),  Бонки миллии Тоҷикистон /БМТ/, намояндагони вазорату идораҳо ва бонкҳои тиҷоратӣ  баррасӣ гардид.

Муовини Вазири молияи ҷумҳурӣ Юсуф Маҷидӣ ва роҳбари намояндагии БАТР дар Тоҷикистон Айтен Рустамова оид ба ташаккул ва рушди бозори сармоя ва коғазҳои қиматнок дар Тоҷикистон, такмили асосҳои ниҳодӣ ва ташкиливу иқтисодии  барориши коғазҳои қиматноки давлатӣ, нақш, аҳамият ва мушкилоти ширкати бахши хусусӣ дар рушди бозори сармояи Тоҷикистони ибрози назар намуданд.

Иҷрокунандаи вазифаи директори Департаменти сиёсати монетарӣ, тадқиқотӣ ва рушди Бонки миллии Тоҷикистон Нигина Қурбоналиева зимни муаррифии рӯнамоӣ дар мавзӯи «Татбиқи ислоҳот баҳри гузариши сиёсати монетарӣ ба низоми ҳадафгирии таваррум» иштирокдорони ҳамоишро бо дурнамои Стратегияи сиёсати пулию қарзӣ ва асъории БМТ барои солҳои 2016-2020 ва тадбирҳои дар доираи ин стратегия татбиқшаванда шинос намуд.

Зикр шуд, ки бо татбиқи пайвастаи ислоҳоти сохтории нав дар самти васеъ намудани имкониятҳои сиёсати монетарӣ фишангҳои муосири доимии амалиёт ва таҳкими механизми нави амалиёти коғазҳои қиматнок  ва дар ин замина беҳтар намудани идоракунии пардохтпазирӣ баҳри вусъат додани бозори байнибонкӣ, татбиқи стратегияи коммуникатсионӣ дар самти сиёсати пулию қарзӣ ва моделҳои иқтисодии истифодашаванда баҳри муайян намудани мавқеи сиёсати пулию қарзӣ аз ҷониби БМТ тадбирҳо андешида шудаанд. Густариши ислоҳоти ниҳодӣ, таҳкими фишангҳо ва вусъати дараҷаи таъсирбахшии онҳо, пеш аз ҳама, ба меъёрҳои фоизии кӯтоҳмуддати бозори пулӣ ва ба ин васила ба вазъи макроиқтисодӣ сатҳи талаботи маҷмӯӣ ва меъёри таваррум буда, марҳила ба марҳила ташкили фазои мусоид ва заминаи устуворро барои гузариш ба реҷаи нави татбиқи сиёсати пулию қарзӣ — ҳадафгирии таваррум пешбинӣ менамояд. Зимни рӯнамоӣ инчунин сардори Идораи амалиёт дар бозори озоди БМТ  Мирҳаёт Ёқубов оид ба инфрасохтори бозори байнибонкӣ тавзеҳи мушаххас дод. Инчунин барои донишҷӯёни макотиби олӣ аз ҷониби масъулини БМТ рӯнамоии «Татбиқи сиёсати пулию қарзӣ дар Ҷумҳурии Тоҷикистон» манзур гардид.

Дар семинари амалӣ ҳамзамон дар мавзӯи «Ташаккул ва инкишофи бозори пул ва бозори сармоя дар Ҷумҳурии Тоҷикистон: замина, тамоюл ва татбиқи дурнамо дар асоси таҷрибаи байналмилалӣ» оид ба рушди бозори сармоя дар мамлакат бо истифода аз таҷрибаи кишварҳои дигар, васеъ кардани доираи он ва татбиқи ислоҳот дар самти қонунгузорӣ ибрози назар карда шуд.