Муайян намудани усулҳои танзими сиёсати фоизӣ дар низоми бонкӣ

ДУШАНБЕ, 04.03.2019/АМИТ «Ховар»/. Масъалаи муайян намудани усулҳои танзими сиёсати фоизӣ дар низоми бонкӣ дар ҷаласаи  Гурӯҳи корӣ оид ба идомаи фаъолият дар самти муайян кардани арзиши қарз дар ташкилотҳои қарзӣ, ки 1 март дар Бонки миллии Тоҷикистон доир гардид, баррасӣ шуд.

Дар ҷаласа муовини раиси Бонки миллии Тоҷикистон /БМТ/ Лола Салимова зикр кард, ки бо мақсади иҷрои супориши Президенти мамлакат дар ҷаласаи XVII Шӯрои машваратии назди Президенти Ҷумҳурии Тоҷикистон оид ба беҳтар намудани фазои сармоягузорӣ  ва ҷаласаи васеи Ҳукумати Ҷумҳурии Тоҷикистон аз 21 январи соли 2019, ҷиҳати муайян кардани арзиши қарз дар ташкилотҳои қарзӣ ва дарёфти роҳҳои давра ба давра паст намудани меъёри фоизи қарз дар БМТ Гурӯҳи корӣ таъсис дода шудааст. Гурӯҳи корӣ дар ин муддат корҳои зиёдро барои муайян намудани арзиши аслии қарз ба итмом расонид.  БМТ назорати татбиқи сиёсати фоизиро ҳамчун омили таъсиррасони рушди иқтисодиёти кишвар ба роҳ мондааст. Дар натиҷа меъёри миёнавазни қарзҳо аз 28,2 фоиз дар соли 2017 ба 26 фоиз дар соли 2018 паст карда шуда, ҳаҷми қарзҳои додашуда аз 7,7 млрд. сомонӣ ба 8,2 млрд. сомонӣ афзуд.

Зикр гардид, ки марҳилаи дуюми пешгирифтаи Гурӯҳи кории БМТ баҳри муайян намудани усулҳои танзими сиёсати фоизии ташкилотҳои қарзӣ равона мешавад, ки дар ин самт дар ҳамкорӣ бо ташкилотҳои қарзӣ татбиқи он амалӣ хоҳад шуд.

Дар ҷаласа сардори идораи омор ва тавозуни пардохт Бахтиёр Баҳридинов оид ба ҷамъбасти фаъолияти низоми бонкӣ дар соли 2018 ва мавқеи низоми бонкӣ дар Паёми Пешвои миллат сухан кард. Мавсуф ҳамзамон «Муайян намудани усулҳои танзими сиёсати фоизӣ дар низоми бонкӣ»-ро бо таҳлили васеъ оид ба нишондиҳандаҳои фоизии ташкилотҳои қарзӣ дар марҳилаҳои гуногун муаррифӣ ва тамоюли афзоишу коҳишро пешкаши иштирокдорон намуд. Зимни муаррифӣ оид ба сандуқи қарзӣ ва қарзҳои додашуда, бақияи пасандозҳо, меъёри фоизи қарзу пасандозҳо, хавфҳо ва камбудиҳои ҷойдошта дар фаъолияти ташкилотҳои қарзӣ ва тадбирҳои андешидашуда баҳри бартараф намудани онҳо, талабот доир ба пур кардани ҳисоботи оморӣ ва вазифаҳо барои соли 2019, дурнамои ташкилотҳои қарзӣ оид ба пешниҳоди қарз маълумоти муфассал пешниҳод гардид.

Зикр карда шуд, ки барои рушди низоми бонкӣ бояд сатҳу сифати хизматрасониҳо баланд ва шаффофияти фаъолият таъмин карда шуда, ҳисоботи молиявӣ ва маълумот оид ба хизматрасониҳо сари вақт дар сомонаҳои ташкилотҳои қарзӣ нашр гарданд. Роҳандозии корҳои таблиғотиву ташвиқотӣ дар ВАО ҷоннок ва маҳсулоти нави амонатӣ барои интиқолгирандагон ҷорӣ карда шавад.

Муовини раиси БМТ Лола Салимова таъкид кард, ки бонкҳо ва ташкилотҳои қарзӣ барои дастгирии соҳибкории хурду миёна, ки рушди иқтисоди миллии кишварамон аз он вобастагии ҳамаҷониба дорад, бо истифода аз ҳисоби манбаҳои худӣ, амонатҳои ҷалбшуда, ташкилотҳои қарзии дохилии ҷумҳурӣ, БМТ ва ташкилотҳои байналмилалӣ саҳми арзандаи худро бо пешниҳоди фоизҳои дастрас ба аҳолӣ гузоранд. Аз ин рӯ, ба ташкилотҳои қарзӣ дастур дода шуд, ки то муҳлати муайян ҷиҳати муайян намудани усулҳои танзими сиёсати фоизӣ дар низоми бонкӣ таклифу пешниҳодҳои худро барои корбарии минбаъдаи Гурӯҳи корӣ ирсол намоянд.