Сумангул Тағойзода ва Элмира Зарипова афзалият ва ҳадафҳои амалкунандаи соҳаро муҳокима намуданд

ДУШАНБЕ, 18.03.2019 /АМИТ «Ховар»/. Имрӯз, 18 март дар ҳошияи Форуми соҳибкорони Тоҷикистон ва Тотористон мулоқоти Вазири меҳнат, муҳоҷират ва шуғли аҳолии Ҷумҳурии Тоҷикистон Сумангул Тағойзода бо Вазири меҳнат, шуғл ва ҳифзи иҷтимоии Ҷумҳурии Тотористон Элмира Зарипова доир гардид.

Тавре аз Вазорати меҳнат, муҳоҷират ва шуғли аҳолӣ ба АМИТ «Ховар» хабар доданд, зимни вохӯрӣ тарафҳо афзалият ва ҳадафҳои амалкунандаи соҳаро мавриди муҳокима қарор дода, ба масъалаҳои муносибатҳои меҳнатӣ, шуғли аҳолӣ, мубодилаи маълумот ва таҷриба, иштирок дар конфронсу семинарҳои соҳавӣ ва дигар чорабиниҳо, ки дар қаламрави ҷумҳуриҳои Тоҷикистон ва Тотористон баргузор мегарданд, таваҷҷуҳ зоҳир намуданд.

Тарафҳо ба роҳ мондани ҳамкории минбаъдаро дар асоси санади меъёрии ҳуқуқии соҳавӣ  ба мақсад мувофиқ ҳисобиданд.

Вохӯрӣ дар фазои дӯстона ва ҳусни тафоҳум баргузор гардид.