Теъдоди харидорони лимӯ ва хурмои Тоҷикистон дар бозорҳои ҷаҳон меафзояд

ДУШАНБЕ, 15.03.2019/АМИТ «Ховар»/. Интизор меравад, ки дар оянда лимӯ ва хурмои Тоҷикистон дар растаҳои бозорҳои ҷаҳон ба фурӯш гузошта шаванд. Дар ин росто бо мақсади дастгирии соҳибкорон ва тақвияти рушди содирот, барои таҳияи стандартҳои маҳсулоти кишоварзӣ ва бе монеа роҳ ёфтан ба бозори ҷаҳонӣ бо ташаббуси Агентии «Тоҷикстандарт» дар ҳамкорӣ бо ташкилоти байналмилалии «Hilfswerk Austria», «GIZ» ва «UNDP» дар Ҷумҳурии Тоҷикистон барои содироти маҳсулоти ватанӣ ба хориҷи кишвар гурӯҳи кории техникӣ ташкил карда шуд. 

Тавре аз  Агентии «Тоҷикстандарт» ба АМИТ «Ховар» хабар доданд, аз  ҷониби гурӯҳи кории мазкур   рисолаҳои тавзеҳӣ аз рӯи стандартҳои байналмилалии  «ЕЭК ООН FFV-25» барои содирот ва назорати сифати маҳсулоти пиёзи барвақтӣ ва стандарти «ЕЭК ООН FFV-63» барои содирот ва назорати сифати маҳсулоти хурмо таҳия шудаанд.

Айни замон аз ҷониби гурӯҳи корӣ оид ба таҳияи стандарти байналмилалӣ барои меваи лимӯ корҳо оғоз гардида, дар асоси талаботи байналмилалӣ барои ба қайд гирифтани нишондиҳандаҳои зарурии лимӯ,  аз ҷумла нуқсонҳои табиӣ, нуқсонҳои техникӣ, намуд, шакл ва вазни он намунаҳо гирифта шуда, корҳои баҳодиҳӣ идома доранд.