Дар Тоҷикистон амалиёти «Муоинаи техникӣ» оғоз гардид

ДУШАНБЕ, 15.04.2019 /АМИТ «Ховар»/.  Раёсати Бозрасии давлатии автомобилии Вазорати корҳои дохилии Ҷумҳурии Тоҷикистон аз имрӯз, 15 апрел дар қаламрави ҷумҳурӣ гузаронидани амалиёти «Муоинаи техникӣ» — ро ба роҳ мондааст.

Тавре аз Вазорати корҳои дохилӣ ба АМИТ «Ховар» хабар доданд, амалиёти мазкур бо мақсади пешгирии ҳодисаҳои роҳу нақлиёт, баланд бардоштани ҳолати техникӣ, ҷалб намудани воситаҳои нақлиёт ба муоинаи ҳатмии давлатии техникӣ ва назорати пардохти маблағи андоз аз соҳибони онҳо гузаронида мешавад.

Бояд гуфт, ки ин амалиёт то 25 апрели соли равон идома меёбад.

Дар ҳамин робита Раёсати БДА аз тамоми ронандагони воситаҳои нақлиёт даъват ба амал овардааст, ки дар гузаронидани амалиёти мазкур саҳми арзанда гузоранд. Телефонҳо барои тамос 235-45-45; 236-05-35.