Пагоҳ дар «Боғи Ирам» Фестивали ҷумҳуриявӣ таҳти унвони «Ҳунар беҳтар аз зар бувад» баргузор мегардад

ДУШАНБЕ, 26.04.2019. /АМИТ «Ховар»/. 27 апрели соли равон, дар Муассисаи давлатии «Боғи Ирам»-и шаҳри Душанбе   Фестивали ҷумҳуриявӣ  таҳти унвони «Ҳунар беҳтар аз зар бувад» баргузор мегардад.

Дар  Фестивали мазкур  муассисаҳои таҳсилоти ибтидоии касбӣ ва марказҳои таълимии Маркази таълими калонсолони Вазорати меҳнат, муҳоҷират ва шуғли аҳолии Ҷумҳурии Тоҷикистон намунаи ҳунарҳои мардумиро  пешкаши сокинон ва меҳмонони пойтахт мегардонанд.

Тавре аз Вазорати мазкур ба АМИТ «Ховар» хабар доданд, ин Фестивал бо мақсади иҷрои Нақшаи баргузории фестивал, намоиш, ид ва озмунҳои анъана ва ҳунарҳои мардумӣ дар Ҷумҳурии Тоҷикистон барои солҳои 2019-2021, ки бо Амри Президенти Ҷумҳурии Тоҷикистон аз 13 декабри соли 2018 тасдиқ гардидааст, роҳандозӣ мегардад. Хоҳишмандон метавонанд дар ин Фестивал иштирок намоянд.