РОЗА ОТУНБОЕВА: «ТОҶИКОН ЗОТАН МИЛЛАТИ ШЕЪРПАРВАР ВА ЗЕБОПАРАСТ МЕБОШАНД». Президенти собиқи Қирғизистон дар расми ифтитоҳи Рӯзҳои Тоҷикистон дар Фестивали «Роҳи бузурги абрешим» сухан гуфт

ДУШАНБЕ, 12.04.2019./АМИт «Ховар»/.  «Миллати тоҷик табиатан ва зотан ба зебоиву сухани воло  арҷ мегузорад ва осори адибону орифони тоҷик мавриди таваҷҷуҳи ҷаҳониён қарор дорад», — изҳор намуд  собиқ президенти  Қирғизистон Роза Отунбоева дар доираи баргузории ҷашнвораи «Роҳи бузурги абрешим», ки дар шаҳри Бишкек баргузор гардид.   Дар ин бора хабарнигори АМИТ «Ховар» бо истинод ба Сафорати Ҷумҳурии Тоҷикистон дар Ҷумҳурии  Қирғизистон иттилоъ медиҳад.

Қобили зикр аст,ки маҳз ба ибтикори Фонди байналмилалии  «Ташаббуси Роза Отунбоева»   5 апрели соли равон дар бинои Музеи ҳунарҳои наққошии Қирғизистон фестивали «Роҳи бузурги абрешим» ба кори худ оғоз намуд, ки ин шабу рӯз ба унвони ҳодисаи нодир ва ҷолиби фарҳангӣ дар Қирғизистон арзёбӣ мегардад.

Дар ин ҳамоиш сафоратхонаҳои 15 кишвари ҳавзаи  Роҳи  абрешим  ширкат намуда, гӯшаҳои махсуси худро ба  маърази  тамошо гузоштанд.   11 апрел дар  доираи  ин ҳамоиш Рӯзи фарҳанг ва ҳунарҳои мардумии Тоҷикистон доир гардид ва тамошобинони сершумор аз он боздид намуданд.
Сафири Тоҷикистон дар Қирғизистон Суҳроб Олимзода  дар расми ифтитоҳи ин барнома баргузории чунин  тадобири  фарҳангиро дар таҳкими дӯстӣ ва  ҳамгироии кишварҳои минтақаи Осиёи Марказӣ, аз ҷумла мардумони тоҷик ва қирғиз муҳим унвон кард.

Бо ширкати донишҷӯёни тоҷикистонии муқими Бишкек барои тамошобинон рақсу таронаҳои миллии тоҷикӣ ва маҳсули ҳунарҳои мардумӣ намоиш дода шуд.

Фестивали  Роҳи  бузурги абрешим» то 26 апрел  идома  мекунад.