Бонки миллии Тоҷикистон ҷиҳати иҷрои дастуру супоришҳои Пешвои миллат нақшаи чорабиниҳо таҳия намуд

Май 17, 2019 10:30

ДУШАНБЕ, 17.05.2019/АМИТ «Ховар»/. Бонки миллии Тоҷикистон оид ба иҷрои дастуру супоришҳои Пешвои миллат дар вохӯрӣ бо кормандони   соҳаҳои молия, андоз, гумрук ва бонкҳо лоиҳаи Нақшаи чорабиниҳо таҳия намудааст. Аз Бонки миллии Тоҷикистон ба АМИТ «Ховар» иттилоъ доданд, ки дар ин росто таҳти роҳбарии раиси Бонки миллии Тоҷикистон Ҷамшед Нурмаҳмадзода бо иштироки роҳбарони бонкҳо ва ташкилотҳои амонатии қарзии мамлакат барои иҷрои дастуру супоришҳои Асосгузори сулҳу ваҳдати миллӣ — Пешвои миллат муҳтарам Эмомалӣ Раҳмон, ки 10 майи соли 2019, зимни мулоқот бо кормандони мақомоти молия, андоз, гумрук, сармоягузорӣ ва бонкҳо дода шуда буд, ҷаласаи корӣ баргузор гардид.

Раиси БМТ Ҷамшед Нурмаҳмадзода зикр намуд, ки низоми бонкии мамлакат яке аз омилҳои муҳими рушди иқтисодиву иҷтимоии Тоҷикистон маҳсуб ёфта, аз ҳар кадоми мо тақозо менамояд, ки барои рушду такомули он фаъолияти босамар дошта бошем. Ва бо истифода аз имконияту шароити мусоид баҳри бартараф намудани камбудиҳои соҳа, ки Пешвои миллат зимни суханронӣ дар мулоқот бо кормандони мақомоти молия, андоз, гумрук, сармоягузорӣ ва бонкҳо ироа намуданд, кӯшиш ба харҷ диҳем, то эътимоди аҳолиро ба бонкҳо барқарор намоем.

“Татбиқи сиёсати пулию қарзии БМТ, назорат ва баҳодиҳии дурусти низоми бонкӣ, пешгирии талафоти имконпазир ва коҳиш додани сатҳи хавфҳои эҳтимолӣ ба низоми бонкӣ, дуруст ба роҳ мондани сиёсати қарздиҳӣ ва коҳиш додани меъёрҳои фоизӣ, кам кардани ҳиссаи қарзҳои ғайрифаъол, ҷалби бештари сармояи хориҷӣ ба иқтисодиёти кишвар ва баланд бардоштани маърифати молиявии аҳолӣ метавонад барои бартараф намудани камбудиву норасоиҳои соҳа ҳиссагузор бошад”,- иброз дошт Ҷ.Нурмаҳмадзода.

Дар идома лоиҳаи Нақшаи чорабиниҳои БМТ оид ба иҷрои дастуру супоришҳои Пешвои миллат ҷиҳати пешниҳоди таклифҳо манзур карда шуд. Бояд тазаккур дод, ки лоиҳаи нақшаи чорабиниҳо вобаста ба бартараф намудани камбудиҳои зимни мулоқот аз ҷониби Пешвои миллат ироагардида таҳия шуда, тамоми паҳлуҳои соҳаи низоми бонкӣ ва суғуртаро фарогир мебошад. Аз ҷумла, баланд бардоштани эътимоди аҳолӣ ба низоми бонкӣ, истифодаи фишангҳои иловагӣ баҳри татбиқи сиёсати пулию қарзӣ,  дастрасии аҳолӣ ба хизматрасониҳои молиявӣ, ҳимояи ҳуқуқҳои истеъмолкунандагони низоми молиявӣ, ҷалби бештари бонувон ба низоми бонкӣ, коҳиш додани қарзҳои ғайрифаъол дар сандуқи қарзӣ, паст кардани меъёрҳои фоизӣ дар сиёсати қарзии бонкҳо, зиёд кардани доираи марказҳои хизматрасонии бонкӣ, интихоби дурусти кадрҳои баландихтисос дар воҳидҳои сохтории бонкҳо ва ташкилотҳои қарзӣ. Инчунин ба бонкҳо ва ташкилотҳои қарзӣ барои таҳия намудани пешниҳодҳои худ ҷиҳати ворид намудан ба нақшаи чорабиниҳои мазкур дастур дода шуд.

Дар ҷаласа масъалаҳои дедолиракунонии иқтисодиёт, поён бурдани таъсири асъори хориҷӣ дар бозори хизматрасониҳои бонкӣ, қобилияти пардохтпазирӣ ва сармояи бонкҳо, афзоиши дастрасии аҳолӣ ба хизматрасонии арзони воситаҳои молиявӣ, таъсиси бештари филиалҳо ва марказҳои хизматрасонӣ, омода кардани мутахассисони баландихтисоси соҳаи бонкдорӣ ва ҷалби бештари бонувон ба низоми бонкии мамлакат, бахусус ба вазифаҳои масъулияти моддидошта баррасӣ гардиданд.

Инчунин муовини раиси БМТ Ҳамидулло Машрабзода доир ба ҷараёни иҷрои қарори Ҳукумати Ҷумҳурии Тоҷикистон «Оид ба тадбирҳои вусъат бахшидани ҳисоббаробаркуниҳои ғайринақдӣ» зикр намуд, ки бо вуҷуди иҷрои корҳои назаррас дар самти тадбиқи қарори мазкур, зиёд кардани ҳиссаи ҳисоббаробаркунии ғайринақдӣ дар муомилот ҳоло ҳам баъзе мушкилот, аз ҷумла, аз ҷониби ташкилотҳои карзӣ фароҳам овардани шароити мусоид барои таъмини терминалҳои электронӣ ва истифодаи онҳо дар марказҳои савдою хизматрасонӣ дида мешавад.

Дар ин росто, раиси БМТ  таъкид дошт, ки  бонкҳо ва ташкилотҳои қарзӣ барои ҳарчи зудтар амалӣ намудани таъмини татбиқи қарори мазкур тадбирҳои таъхирнопазир андешида, барои қабули ҳаққи ҳама намуди хизматрасониҳо бо истифода аз воситаҳои электронӣ бо вазорату идораҳои марбута  ҳамкории судманд ба роҳ монанд.

Май 17, 2019 10:30

Хабарҳои дигари ин бахш

Баҳодур Шерализода дар Самарқанд доир ба омодагӣ ба Конференсияи байналмилалии сатҳи баланд оид ба ҳифзи пиряхҳо маълумот дод
Дар шаҳри Душанбе иҷрои «Барномаи фишанги ҳамоҳангсозии сиёсат» баррасӣ гардид
Ҳаҷми гардиши савдои хориҷии Тоҷикистон ва Узбекистон соли 2024 1,74 маротиба зиёд гардид
Барномаи савдои электронӣ дар Тоҷикистон ба баланд бардоштани малакаи рақамию молиявии аҳолӣ ва соҳибкорон равона шудааст
Оё дар Тоҷикистон низоми кишти пунбадона тағйир меёбад? Шарҳи коршиносон дар ин мавзуъ
Дар шаҳри Гулистон Бизнес-форуми Тоҷикистон ва Тотористон баргузор гардид
Имконоти сайёҳии Тоҷикистон дар Намоишгоҳи байналмилалии сайёҳии «Лето-2025» муаррифӣ шуданд
Ҳайати Тотористон бо фаъолияти як қатор корхонаҳои саноатии вилояти Суғд шинос гардид
Дар ноҳияи Кӯшониён дар 320 гектар гармхона бунёд карда шудааст
Гармхонаҳои ширкати «Моғиён- агро»-и шаҳри Панҷакент бозорро бо сабзавоти тоза таъмин менамоянд
Хатмкунандагони Барномаи гузариши иқлимӣ соҳиби шаҳодатнома шуданд
Дар шаҳри Турсунзода бинои нави маъмурии Истгоҳи роҳи оҳани «Регар» ба истифода дода шуд