Дар Душанбе Конфронси илмӣ-амалии ҷумҳуриявӣ оид ба масъалаҳои таҷдиди хадамоти библиографӣ барпо мешавад

ДУШАНБЕ, 02.05.2019. /АМИТ «Ховар»/. 2-3 майи соли равон  дар шаҳри Душанбе бо ибтикори Китобхонаи давлатии патентию техникии Муассисаи давлатии «Маркази миллии патенту иттилоот»-и Вазорати рушди иқтисод ва савдои Ҷумҳурии Тоҷикистон ҳафтумин конфронси ҷумҳуриявии «Масъалаҳои таҷдиди хадамоти библиографӣ дар фаъолияти кории китобхонаҳои Тоҷикистон» баргузор мегардад.

Тавре ба мухбири АМИТ «Ховар» аз муассисаи мазкур хабар доданд, мақсад аз баргузор намудани силсилаконфронсҳои соҳаи китобдорӣ муайяну мушаххас намудани муаммоҳои ҷойдошта дар раванди таҷдиди хадамоти библиографӣ дар фаъолияти кории китобхонаҳои Тоҷикистон, масоили дурнамои рушди китобхонаҳо дар самти ҷамъоварӣ, коркарди илмӣ, гурӯҳбандӣ ва мавриди омӯзишу тарғиб  қарор додани манобеи билиографӣ, билиографӣ- электронӣ, ташкили дастурҳо, роҳнамо, сарватҳои иттилоотӣ ва маъхазҳои библиографӣ бо истифода аз  фондҳои чопӣ, манобеи электронии китобхонаҳо ва марказҳои иттилоотӣ, таъмини дастёбии хонандагон ба сарчашмаҳои пурраматни китобхонавӣ ва таъмини талабу дархости ҷомеа бо адабиёти ниёзи хониш мебошад.

Дар назар аст, ки дар конфронс кормандони китобхонаҳои шахсӣ, ҷамоатҳо, деҳаҳо, китобхона-филиалҳо, китобхонаҳои марказии шаҳру ноҳияҳо, китобхонаҳои оммавии вилоятҳо, китобхонаҳои муассисаҳои таҳсилоти миёнаву олии касбии кишвар ва Китобхонаи миллии Тоҷикистон роҷеъ ба масоили вазъи кунунии хизматрасонӣ бо дарназардошти воридшавии технологияи нави иттилоотӣ дар фаъолияти китобхонаҳо таваҷҷуҳи хосса зоҳир намоянд.

Ҳамзамон андешаҳои ҷолиб перомуни мувофиқу мутобиқ намудани самтҳои афзалиятноки фаъолияти китобхонаҳо ба тақозои даврони истиқлол ва вижагиҳои ҷомеаи иттилоотӣ дар самти таҷдиди хадамоти библиографӣ дар кори китобхонаҳои Тоҷикистон  масъалагузорӣ хоҳанд гардид.