Дар Хуҷанд хотираи шаҳидони ҷанги солҳои 1941-1945-ро пос доштанд

ХУҶАНД, 08.05.2019, /АМИТ «Ховар»/. Имрӯз  дар маркази Суғд -шаҳри Хуҷанд дар назди ёдгории шаҳидони Ҷанги дуюми ҷаҳонӣ бахшида ба 74-умин солгарди Ғалабаи халқи шӯравӣ ба фашизм ҷамъомади пуршукӯҳ баргузор гардид.

Бино ба иттилои хабарнигори АМИТ Ховар дар Суғд, дар ҳамоиши идона иштирокчиёни ин набард ва меҳнаткашони ақибгоҳ, собиқадорони меҳнат, инчунин иштирокчиёни ҷангҳои байналмилалӣ, намояндагони корпусҳои дипломатӣ ва меҳмонони хориҷии Хуҷандшаҳр, намояндагони бародаршаҳри Шимкенти Ҷумҳурии Қазоқистон, сарбозону афсарони гарнизони ҳарбии Суғд ва сокинони маркази вилоят иштирок намуданд.

Раиси вилояти Суғд Раҷаббой Аҳмадзода ва раиси шаҳри Хуҷанд Маъруф Муҳаммадзода ҳамроҳи шуҷоатмандони ватан, ки дар набардҳои шадид ҷонбозиҳо намудаанд, дар лаҳзаи мутантан ба пояи ёдгории шаҳидони ин ҷанг гулчанбар гузошта, хотираи неки фарзандони диёрро, ки баҳри озод намудани инсоният аз фашизми гитлерӣ қурбон гаштаанд, пос доштанд. Сипас, гузашти низомии аскарону афсарон ба ҷамъомад ҳусни анҷом бахшид.

Хотиррасон бояд кард, ки ҳоло дар вилояти Суғд 73 нафар иштирокчиёни набардҳои ҷанги солҳои 1941-1945 дар қайди ҳаёт буда, аз онҳо 3 нафарашон, ки яке зан мебошад, дар маркази вилоят — шаҳри Хуҷанд иқомат доранд.

Ҳамзамон дар қайди Шӯрои собиқадорони ҷангу меҳнати вилоят 368 нафар заҳматкашони ақибгоҳ низ дар қайд буда, ҷавонтарини онҳо 92- сола ва бузургтаринашон 100-сола мебошанд. Ҳамаи онҳо дар арафаи таҷлили ҷашни мазкур бо кумакпулиҳои Президенти мамлакат ба маблағи 5000 сомонӣ, мақомоти вилоятӣ ба маблағи 2000 сомонӣ ва шаҳрию ноҳиявӣ ба маблағи 1500 сомонӣ таъмин гардиданд.

Давоми чанд сол аст, ки маҳз бо ташаббус ва дастгирии Ҳукумати мамлакат ҳамаи иштирокчиёни Ҷанги дуюми ҷаҳонӣ дар як сол ду маротиба ба хизматрасонӣ ва дорувории ройгони тиббӣ ҷалб гардида, ба онҳо аз соли 2003 инҷониб роҳхатҳо ба осоишгоҳҳои миқёси вилоят дода мешаванд.