Дар Душанбе аввалин мусобиқаи кушод оид ба волейбол байни бонувон барои дарёфти «Ҷоми пойтахт-2019» оғоз гардид

ДУШАНБЕ, 20.06.2019. /АМИТ «Ховар»/. Бахшида ба   22-умин  солгарди  Рӯзи Ваҳдати миллӣ   дар  шаҳри Душанбе аввалин мусобиқаи кушод  оид ба волейбол  байни бонувон    барои дарёфти «Ҷоми пойтахт-2019» оғоз гардид. Мусобиқаи мазкур  19 июн оғоз гардида, то  26 июн  идома меёбад.

Тавре мухбири АМИТ «Ховар» Меҳрони  Қурбон хабар медиҳад,   дар кушодашавии мусобиқаи мазкур муовини раиси шаҳри Душанбе Мавсума Муинӣ ва муовини аввали раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон  Ризо  Назарзода   иштирок доштанд.

Дар мусобиқаи мазкур 11 дастаи волейболбозон, аз ҷумла  4  даста  аз шаҳри Душанбе,  2 дастаӣ  аз вилоятҳои  Суғд, Хатлон ва  ВМБК,  1 даста аз шаҳру ноҳияҳои тобеи марказ  иштирок ва байни ҳам рақобат  мекунанд.

Хотирасон  менамоем, ки  ин  мусобиқа  бо  ташаббуси Мақомоти иҷроияи ҳокимияти давлатии шаҳри Душанбе ва   Кумитаи кор бо ҷавонон ва варзиши назди Ҳукумати Ҷумҳурии Тоҷикистон  бо мақсади ба варзиш ҷалб намудани занону духтарон ва ташвиқи тарзи ҳаёти солим  дар пойтахт роҳандозӣ гардид.