Футбол: имрӯз дастаҳои мунтахаби футзали то 20-солаи Тоҷикистон ва Қирғизистон бозии дуввуми худро барпо менамоянд

ДУШАНБЕ, 04.06.2019. /АМИТ «Ховар»/. Дастаи мунтахаби то 20 солаи Тоҷикистон оид ба футзал дар доираи омодагӣ ба марҳилаи ниҳоии Чемпионати Осиё-2019 дар шаҳри Бишкек аввалин бозии рафиқонаро бо тими мунтахаби миллии Қирғизистон баргузор намуд.

Тавре АМИТ «Ховар» бо истинод ба сомонаи расмии Федератсияи футболи Тоҷикистон хабар медиҳад, вохӯрӣ бо натиҷаи 5:4 ба суди соҳибони майдон анҷом ёфт. Аз ҳайати дастаи мунтахаби Тоҷикистон тӯбҳоро Комрон Алиев, Идрис Ёров, Манучеҳр Сафаров ва Мирзорауф Умаров ба нишон расониданд.

Имрӯз дастаҳои мунтахаби футзали то 20-солаи Тоҷикистон ва Қирғизистон бозии дуввуми худро барпо менамоянд.

Ёдовар мешавем, ки дар марҳилаи ниҳоии Чемпионати Осиё-2019, ки 14-22  июни соли равон дар шаҳри Табрези Эрон доир мешавад, дастаи мунтахаби Тоҷикистон дар гурӯҳи «С» бо дастаҳои мунтахаби  футзали  Япония  ва Ветнам рақобат мекунад.