Дар пойгоҳи Вазорати мудофиаи Ҷумҳурии Тоҷикистон ҷамъомади таълимӣ-методӣ гузаронида шуд

Июль 8, 2019 11:02

ДУШАНБЕ, 08.07.2019/АМИТ «Ховар»/. Дар доираи иҷрои дастуру супоришҳои Асосгузори сулҳу ваҳдати миллӣ, Пешвои миллат, Сарфармондеҳи Олии Қувваҳои Мусаллаҳи Ҷумҳурии Тоҷикистон  муҳтарам Эмомалӣ Раҳмон ва дар асоси нақшаи чорабиниҳои  Вазорати мудофиаи  мамлакат  5-6 июл дар пойгоҳи Вазорати мудофиаи Ҷумҳурии Тоҷикистон бо иштироки роҳбарони мақомоти марказии ҳокимияти давлатии Ҷумҳурии Тоҷикистон ҷамъомади таълимӣ-методӣ доир гардид. Дар ин бора ба  АМИТ  «Ховар» сардори Маркази матбуоти Вазорати мудофиаи Ҷумҳурии Тоҷикистон  подполковник Ориф Нозимиён иттилоъ дод.

Тибқи иттилои сарчашма, котиби Шӯрои амнияти ҷумҳурӣ Маҳмадалӣ Ватанзода   доир ба самтҳои афзалиятноки  ҳамкорию  ҳамоҳангсозии  мақомоти  давлатии Ҷумҳурии Тоҷикистон сухан карда, баргузории ҷамъомади таълимӣ-методӣ ва  дигар масъалаҳои амниятиро, ки дар замони осоишта ва ҳолати ҷанг муайян ва танзим мешаванд, бисёр муҳиму  саривақтӣ арзёбӣ намуд.

Ҳамзамон Вазири мудофиаи мамлакат Шералӣ Мирзо роҷеъ ба  сиёсати дифоии ҷумҳурӣ, вазъи сиёсии минтақа  ва ҷаҳон,  таҳдиди хатарҳои ҷаҳони муосир,  авҷ гирифтани амалҳои  тундгароиро ҳамаҷониба таҳлилу баррасӣ кард. Вазир изҳор дошт, ки «дар радифи тамоми хизматчиёни ҳарбии сатҳи зинаҳои гуногуни сохторҳои қудративу ҳифзи тартиботи ҷамъиятӣ ва дар маҷмӯъ Қувваҳои Мусаллаҳи мамлакат ва шаҳрвандони эҳтиётии дар қайди комиссариатҳои ҳарбӣ қарор дошта, бояд ҳар як сокини ватандӯсти сарзамин дар партави гуфтаҳои Сарвари давлат дар самти аз даст надодани зиракии сиёсӣ амал намоянд».

Дар рӯзи дуюми ҷамъомади методӣ- таълимии роҳбарони мақомоти марказии ҳокимияти давлатии Тоҷикистон, ки  дар машқгоҳи ҳарбии Фахробод идома ёфт, барои назорати ҷараёни баргузории ҷамъомади мазкур котиби Шӯрои амнияти ҷумҳурӣ, роҳбарон ва намояндагони тамоми сохторҳои низомии мамлакат, мақомоти ҳифзи ҳуқуқу тартибот, масъулини вазорату кумитаҳо ва шахсони расмӣ ба машқгоҳи ҳарбӣ омаданд.

Аз рӯи мавзӯъ ва матлаби баргузории ҷамъомади мазкур дар шароити дашту саҳро ва маҳаллаҳои аҳолинишин бинову иншооти муҳими давлатӣ, мавзеъҳои стратегӣ ва роҳҳои душворгузари кӯҳистони ҳудуди ҷумҳурӣ парвозҳои намунавии қувваҳои ҳарбӣ-ҳавоӣ ва мудофиаи зиддиҳавоии Артиши миллӣ манзур гардонида шуд. Қисмати амалии ин ҷамъомад бо тирпарронии ҷангии ҳайатҳои роҳбарию фармондеҳии сохторҳои қудратию  мақомоти ҳифзи ҳуқуқ ва дигар иштирокчиёни он бо намунаи тамоми силоҳу муҳимоти ҷангӣ, ки аз тарафи ҳайати шахсии ҷузъу томҳои Қувваҳои Мусаллаҳи мамлакат истифода мешаванд,  маҳсуб меёфт.Дар нуктаҳои таълимии ин тамрингоҳи низомӣ ҳайати иштирокчиён бо истифода аз силоҳу муҳимоти мухталифи ҷангӣ тирпарронӣ карданд.

Ҳадафи баргузории ҷамъомади методӣ-таълимии роҳбарони мақомоти марказии ҳокимияти иҷроияи Ҷумҳурии Тоҷикистон баланд бардоштани   иқтидори мудофиавии давлат буда, он ба сайқал додани ҳамоҳангии сохторҳои низомии мамлакат, баланд бардоштани омодагии равонӣ ва сафарбарии кӯшунҳо ҳангоми доир кардани унсурҳои мухталифи зиддитеррористӣ равона мебошад.

Инчунин дар қисмати назариявии ҷамъомади методӣ-таълимӣ Сардори Ситоди генералии Қувваҳои Мусаллаҳи мамлакат доир ба омодагӣ ба сафарбарӣ маърӯза намуд.

Зимни ҷамъбаст котиби Шӯрои амнияти мамлакат доир ба таваҷҷуҳи Президенти Ҷумҳурии Тоҷикистон муҳтарам Эмомалӣ Раҳмон дар самти амнияти давлату миллат, сиёсати дифоии ҷумҳурӣ, таҳкими сулҳу субот, таҳдиди хатарҳои эҳтимолӣ, аз даст надодани ҳушёриву зиракӣ, сайқали маҳорати омодабошии доимии ҷангӣ, баланд бардоштани қудрати мудофиавии мамлакат сухан намуда, ба сатҳи баргузории он баҳои баланд дод.

Дар анҷом ба бархе аз иштирокчиёни ҷамъомади методӣ- таълимии роҳбарони мақомоти марказии ҳокимияти давлатии Тоҷикистон рутбаҳои навбатии ҳарбӣ ва дигар туҳфаҳои хотиравӣ тақдим гардиданд.

 

Июль 8, 2019 11:02

Хабарҳои дигари ин бахш

Тоҷикистон ҳамкориро бо Кумитаи зиддитеррористии Шӯрои амнияти СММ муҳим арзёбӣ намуд
Дар қароргоҳи СММ «Стратегияи Ҷумҳурии Тоҷикистон оид ба муқовимат ба терроризм ва экстремизм барои солҳои 2021-2025» баррасӣ гардид
Прокурори генералии Тоҷикистон бо Роҳбари Намояндагии Иттиҳоди Аврупо дар СММ мулоқот кард
Тоҷикистон ва Дафтари зиддитеррористии СММ иқдомҳои муштарак оид ба мубориза бар зидди терроризмро баррасӣ намуданд
«ВАТАНПАРВАР». Маҳз чунин мусобиқот имкон медиҳанд, ки ҷавонон маҳорату малакаи ҳарбӣ-варзишии худро такмил диҳанд
Давоми 20 рӯз дар Тоҷикистон маъракаи даъвати ҳарбӣ ба қадри 50 фоиз таъмин шуд
ДАР РАМАЗОН ИНФИҶОР ВА…ЧАШМОНИ АШКБОР. Бар асари ду таркиш дар Кобул беш аз 20 нафар мактаббачагон ҷон бохтанд
Дар Қазоқистон машқҳои Низоми муштараки мудофиаи зиддиҳавоии ИДМ баргузор шуданд
Саидиброҳимови дар ҷустуҷӯбуда бо худиқрорӣ ба мақомоти милитсия ҳозир гардид
Пешвои миллат Эмомалӣ Раҳмон: Тоҷикистон ва Қирғизистон масъалаҳои марзиро танҳо бо роҳи осоишта метавонанд ҳал намоянд
Дар Тошканд ҷаласаи коршиносон оид ба омодагӣ ба нишасти котибони Шӯрои амнияти кишварҳои узви СҲШ доир шуд
МИЛИТСИЯ-СИПАРУ ТАКЯГОҲ. Шариф Назарзода сокинони маҳаллаҳои шаҳри Хоруғро ба тақвияти ҳамкории дуҷониба даъват намуд