ФУТБОЛ: дастаи мунтахаби наврасони Тоҷикистон мусобиқаи CAFA 2019-ро бо мусовӣ оғоз кард

ДУШАНБЕ, 27.07.2019 /АМИТ «Ховар»/.   Шоми  дирӯз дастаи  мунтахаби наврасони то 16 солаи Тоҷикистон оид ба футбол  дар даври 1-уми Чемпионати CAFA   бо  дастаи мунтахаби наврасони  то 16 солаи Ӯзбекистон дидор анҷом дод. Дар ин бора ба мухбири АМИТ «Ховар»   Меҳрони Қурбон  аз Федератсияи футболи Тоҷикистон хабар доданд.  

Тибқи иттилои манбаъ, вохӯрии дастаҳо дар варзишгоҳи Марказии ҷумҳуриявии шаҳри Душанбе  дар сатҳи баланду хотирмон сурат гирифта, бо ҳисоби  мусовӣ 1 бар 1 хатм гардид. Голи футболбозони ӯзбекро дар нимаи аввал ҳамлагар Рустам Турдимуродов ба ҳадаф расонид. Аз ҳайати дастаи  мунтахаби Тоҷтикистон бошад, дар қисмати дуюм Алиҷони Айнӣ ба задани гол даст ёфт.

Хотиррасон  менамоем,  ки  бозиҳои  дигари  ҳамин гурӯҳ низ бо  чунин натиҷа хотима ёфтанд.  Тими мунтахаби  наврасони Эрон бар  дастаи мунтахаби Турканистон бо ҳисоби 3:1 ғолиб омад. Дастаи  мунтахаби  наврасони Қирғизистон бошад, дидорашонро  бо тими мунтахаби  наврасони  Афғонистон  бо ҳисоби мусовӣ 2:2 анҷом доданд.

Ёдовар мешавем, ки бозии ояндаи худро дастаи мунтахаби наврасони то 16-солаи Тоҷикистон  имрӯз  27  июли соли  равон  бо дастаи мунтахаби  Қирғизистон доир мекунад, дастаи  мунтахаби  наврасони Ӯзбекистон бошад, бо  тими мунтахаби  Эрон дидор анҷом медиҳад.