«Оила бидуни зӯроварӣ»-таҳти чунин унвон дар мақомоти иҷроияи ҳокимияти давлатии ноҳияи Фирдавсӣ ҳамоиш доир гардид

Июль 25, 2019 13:35

ДУШАНБЕ, 25.07.2019. /АМИТ «Ховар»/. Дар шаш моҳи соли равон шумораи оилаҳои пошхӯрда дар ноҳияи Фирдавсии шаҳри Душанбе 207 ададро ташкил медиҳад, ки нисбат ба ҳамин давраи соли гузашта 7 адад зиёд буда, боиси таассуф ва нигаронӣ мебошад.  Ин нуктаро раиси ноҳияи Фирдавсии шаҳри Душанбе Муҳаммадраҳим Юсуфӣ имрӯз зимни баргузории семинари омӯзишӣ дар мавзӯи «Оила бидуни зӯроварӣ» баён дошт.

Мавсуф иброз намуд, ки масъалаҳои маърифати оиладорӣ, баланд бардоштани масъулияти падару модарон дар таълиму тарбияи фарзанд, омода кардани фарзандон ба ҳаёти мустақилона ва пойдории оила аз ҷумлаи проблемаҳое мебошанд, ки диққати доимии тамоми мақомоти давлатӣ, муассисаҳои таълимӣ ва кулли аъзои ҷомеаро тақозо мекунанд.

«Конститутсияи Ҷумҳурии Тоҷикистон оиларо чун  узви асосии ҷомеа муайян намуда, дар баробари он дар мамлакат даҳҳо санадҳои меъёрию ҳуқуқии вобаста ба оила амал мекунанд, ки ба рушд ва таҳкими он, пешгирии зӯроварӣ дар оила ва ҳифз намудани  ҳуқуқҳои аъзои оила равона гардидаанд»,- афзуд Муҳаммадраҳим Юсуфӣ.

Зикр гардид, ки оила дар фарҳанги миллати куҳанбунёди тоҷик ҳамчун ниҳоди муқаддас эътироф шуда, беҳтарин арзишҳои инсонӣ, аз қабили муҳаббату садоқат, самимияту вафодорӣ ва ҳамдигарфаҳмиву таҳаммулгароӣ маҳз дар он ташаккул меёбанд.

Бояд гуфт, ки мақсад аз баргузории конференсия  баланд бардоштани маърифати оиладорӣ, устувор гардонидани мавқеи оила дар ҷомеа, тақвият бахшидани масъулияти волидайн дар таълиму тарбияи фарзанд, тарғиби тарзи ҳаёти солим, муносибати хуби дуҷониба дар хонавода ва эҳтироми волидайн аз ҷониби навхонадорон мебошад.

Дар ҳамоиш сабабҳои асосии ҷудошавии оилаҳои ҷавон- ин пеш аз ҳама, омода набудани ҷавонон ба ҳаёти оиладорӣ, паст будани  маърифати ҳуқуқӣ,  надоштани маълумоти касбӣ, вазъи иқтисодӣ ва надоштани одоби муошират арзёбӣ гардид.

Директори Ташкилоти ҷамъиятии «Хазинаи Авруосиёгии Осиёи Марказӣ-Тоҷикистон» Азимҷон Сайфиддинов изҳор дошт, ки  харҷҳои беҳуда  метавонанд сабаби  пайдо гардидани  нофаҳмиҳо байни ду оилаи хешшаванда ва ҳатто  сабаби хонавайронии  фарзандони онҳо  гарданд. Чуноне бармеояд, дар аксар ҳолатҳо  хариди таҷҳизоти гуногун аз ҷониби падару модари арӯс сабаби он мегардад, ки марди хонадон то андозае дар таъмини фазои иқтисодии оилавӣ камтаваҷҷуҳ гардида, ҳатто нисбат ба ҳамсари хеш беҳурматӣ зоҳир менамояд.

Зикр гардид, ки Ҳукумати мамлакат ҳамаи инро ба инобат гирифта, Қонуни Ҷумҳурии Тоҷикистон «Дар бораи танзими анъана ва ҷашну маросим дар Ҷумҳурии Тоҷикистон»-ро қабул намуд, ки хеле муҳиму саривақтист.

Тавре ходими илмии Институти фалсафа, сиёсатшиносӣ ва ҳуқуқи Академияи илмҳои Ҷумҳурии Тоҷикистон, номзади илмҳои ҳуқуқшиносӣ Дилшод Муллоев баён дошт, «мо имрӯз дар замони ҷаҳонишавии фарҳангҳо қарор дорем ва набояд ба расму оинҳои ба миллати мо бегона пайравӣ намоем. Пеш аз ҳама, бояд бо фарҳангу одоби муоширати тоҷикона рафтор намоем. Инчунин аз урфу одатҳо, расму ойинҳои костаю шахшуда ва кӯҳнашудаи гузашта, аз ҷумла дар самти  оиладорӣ даст кашем. Оилаи обутобёфтаи солим, намунавӣ, орӣ аз ҳама гуна хулқу атвори нописанд, ҳамқадами замони муосирро барпо ва фарзандони солиму солеҳ  тарбия намоем. Мо бояд, пеш аз ҳама, ба ҷавонон бо сабру таҳаммул буданро омӯзонем, то ки ба ҳар як пастиву баландии рӯзгор тоқат кунанд».

Дар охири ҷамъомад гуфта шуд, ки барои пешгирии ин омилҳо бояд ташкилотҳои ҷамъиятӣ, ниҳодҳои дахлдор, ҷомеаи шаҳрвандӣ, равоншиносон, имомхатибон, муассисаҳои таълимӣ, занону рӯзгордида дар якҷоягӣ амал ва суҳбату мулоқотро бо ҷавонону навхонадорон зиёд намуда, ба онҳо ҳуқуқу уҳдадориҳояшонро фаҳмонанд.

Зарангези ЛАТИФ,
АМИТ «Ховар»

Июль 25, 2019 13:35

Хабарҳои дигари ин бахш

«БАЧА АЗИЗ, ОДОБАШ АЗ ОН АЗИЗТАР…». Ба таълиму тарбияи фарзандон набояд бетарафӣ зоҳир намуд
Маркази тадқиқоти стратегии Тоҷикистон ва Институти байналмилалии Осиёи Марказӣ масоили ҳамкории илмию таҳлилиро баррасӣ намуданд
35-СОЛАГИИ ИСТИҚЛОЛИ ДАВЛАТӢ. Беморхонаи марказии ноҳияи Темурмалик пурра навсозӣ гардид
ЗАБОН ДОНӢ-ҶАҲОН ДОНӢ. Аз 1 апрел кормандони мақомоти давлатӣ, худидоракунии маҳаллӣ ва ташкилотҳои давлатӣ ба омӯзиши ҳатмии забонҳои хориҷӣ фаро гирифта мешаванд
Дар ноҳияи Айнӣ сеюмин ҳамоиши гирандагони стипендияи президентӣ баргузор шуд
НАВРӮЗИ ХУҶАСТАПАЙ МУЖДАИ НЕКИ БАҲОРИ ХУРРАМ. Дар Суғд Ҷашни байналмилалии Наврӯз бо шукуҳи хоса таҷлил шуд
Тоҷикистон терроризму ифротгароиро қотеона маҳкум менамояд
24 МАРТ — РӮЗИ ҶАҲОНИИ МУБОРИЗА БО БЕМОРИИ СИЛ. Ҳадаф аз он огоҳӣ, пешгирӣ ва мубориза бар зидди ин беморӣ мебошад
ИМРӮЗ ДАР ТОҶИКИСТОН — РӮЗИ ГУЛ ВА НИҲОЛШИНОНӢ. Соли 2023 дар ҷумҳурӣ беш аз 1 миллион бех ниҳоли дарахтони гуногун шинонида шуд
МАСЛИҲАТИ МУТАХАССИС. Истеъмоли гулкарам масунияти инсонро боло мебардорад
МАСЛИҲАТИ МУТАХАССИС. Истеъмоли ғизои солим беҳтарин роҳи ҳифзи солимии шахс мебошад
Кормандони Вазорати меҳнат, муҳоҷират ва шуғли аҳолӣ ҷашни Наврӯзро бо тантана таҷлил намуданд