Профессор Аслиддин Осимӣ аз олам даргузашт

Август 8, 2019 10:58

ДУШАНБЕ, 08.08.2019./АМИТ «Ховар»/. Шаби гузашта  табиби маъруфи тоҷик, профессор Аслиддин Осимӣ дар синни 86-солагӣ  вафот кард. Хешовандон, дӯстон, ҳамкорон ва донишҷӯёни устод имрӯз, соати 11.30 ӯро ба роҳи охират гусел менамоянд. Аслиддин Сайфиддинович дар қабристони Сари Осиёи пойтахт дафн карда мешавад.

Профессор Аслиддин Осимӣ асосгузори соҳаи урология дар Тоҷикистон дониста мешавад. Ӯ нахустин урологи тоҷик аст, ки дар доираҳои илмии Россия, Украина, Беларус, Қазоқистон ва Қирғизистон машҳур аст. Профессор то рӯзҳои охирини умраш дар таълими насли ҷавон фаъолона саҳм гузошт.

Осимӣ А.С. дар Хуҷанд таваллуд шудааст. Соли 1959 Донишгоҳи давлатии тиббии Тоҷикистон ба номи Абӯалӣ ибни Синоро бо ихтисоси «корҳои тиббӣ» хатм кардааст. Аз соли 1959 то 1963 дар беморхонаи шаҳрии Хуҷанд ба ҳайси духтури ҷарроҳ фаъолият намудааст.

Соли 1963 ба аспирантураи назди кафедраи ҷарроҳии факултетӣ дар курси урологияи назди Донишгоҳи давлатии тиббии Тоҷикистон ба номи Абӯалӣ ибни Сино дохил шуда, соли 1969 таҳти роҳбарии профессор Василий Николаевич Дунчик рисолаи номзадии худро дар мавзӯи «Лечение мочекаменной болезни в условиях курорта Хоҷа-Оби-Гарм» («Табобати бемории роҳҳои шошадон дар шароити осоишгоҳи Хоҷа Оби Гарм») дифоъ  мекунад.

Дар Донишгоҳи давлатии тиббии Тоҷикистон ба номи Абӯалӣ ибни Сино Аслиддин Сайфиддинович аз ассистент то профессор, мудири кафедраи урология аз соли 1974 то соли 2010, декани факултети тиббӣ солҳои 1975-1982 ва сарурологи Вазорати тандурустии Ҷумҳурии Тоҷикистон фаъолият намудааст.

Вай 2 монография, 6 дастури таълимӣ, зиёда аз 200 мақолаи илмӣ, 10 пешниҳоди ратсионализаторӣ нашр кардааст ва таҳти роҳбарии ӯ 4 рисолаи номзадӣ  ҳимоя гардидаанд.

Барои хизматҳои шоиста ба Ватан А.С.Осимӣ соли 1978 бо унвони «Аълочии тандурустии ИҶШС», соли 1983 — «Духтури шоистаи Ҷумҳурии Тоҷикистон» сарфароз гардонида шудааст. Барои дастовардҳо дар соҳаи таҳсилоти олӣ бо мукофоти «Мактаби олии ИҶШС» ва медали «Собиқадори меҳнат», соли 1973 бо унвони дотсент ва соли 1996 — профессори кафедраи урологияи Донишгоҳи давлатии тиббии Тоҷикистон ба номи Абӯалӣ ибни Сино сарфароз шудааст.

Соли 2009 Президенти Ҷумҳурии Тоҷикистон муҳтарам Эмомалӣ Раҳмон А. Осимиро бо медали «Шафқат» сарфароз гардониданд ва соли 2011 Аслиддин Осимӣ    «Профессори сол» эълон шуд.

Аслиддин Сайфиддиновичро дар доираҳои васеи  донишмандони  Россия, Украина, Беларус, Қазоқистон, Қирғизистон, Ӯзбекистон ва дигар минтақаҳои ИДМ  хуб мешинохтанд. Солҳои ҳаштодум ӯ узви ҳайати таҳририяи маҷаллаи «Урология ва нефрология»-и ИҶШС буд.

Август 8, 2019 10:58

Хабарҳои дигари ин бахш

«ТОҶИКИСТОН-ВАТАНИ АЗИЗИ МАН». 57 нафар довталабон аз Суғд дар даври ниҳоии озмуни ҷумҳуриявӣ иштирок мекунанд
«ТОҶИКИСТОН — ВАТАНИ АЗИЗИ МАН». Дар шаҳри Хоруғ даври вилоятии озмун оғоз ёфт
Дар Самарқанд Симпозиуми байналмилалии ҳайкалтарошӣ бо иштироки ҳунармандони кишварҳои узви Созмони ҳамкории Шанхай оғоз ёфт
Дар ноҳияи Данғара намоиши сайёри «Тоҷикистон–кишвари дарёҳои тиллоӣ» ифтитоҳ гардид
Дар Малайзия ҷомаи нодири таърихии Суғд, ки таърихи 1311-сола дорад, нигоҳдорӣ мешавад
Дар рӯзҳои таҷлили 31-солагии Истиқлолияти давлатӣ барномаҳои фарҳангӣ-фароғатии сиркӣ пешниҳод мегарданд
«НБО-И «РОҒУН» НАМУНАЕ АЗ ИҚТИСОДИ САБЗИ МИНТАҚА». Доир ба аҳамияти иншооти муҳими аср китоб ба нашр расид
ТАБИАТ ҶОН БА ИНСОН БАХШАД ИН ҶО. Дар фасли сайру саёҳат ва истироҳату фароғат истироҳатгоҳҳои Тоҷикистон интизори муштариён ва дӯстдорони табиатанд
«ПЕШВОИ МИЛЛАТ ВА РУШДИ ТОҶИКИСТОНИ СОҲИБИСТИҚЛОЛ». Таҳти чунин унвон китоб ба нашр расид
Дар Бадахшон доир ба амалӣ намудани бандҳои Қонун «Дар бораи забони давлатӣ» ҳамоиши илмӣ-оммавӣ доир шуд
«АКСИ САДОИ ОСИЁ». Мастона Собирзода дар Фестивали XIII байналмилалии ҳунарҳои сирк иштирок мекунад
Блогнависи 19-солаи тоҷик ҳамроҳи Салмон Хон дар филми Болливуд нақш меофарад

Маводҳои таҳлилӣ