Неъматулло Ҳикматуллозода ва Франс Вессиг ҳамкории тиҷоратию иқтисодӣ ва саноатии Тоҷикистону Австрияро баррасӣ карданд

ДУШАНБЕ,  24.09.2019. /АМИТ «Ховар»/. Имрӯз дар шаҳри Душанбе Вазири рушди иқтисод ва савдои Ҷумҳурии Тоҷикистон Неъматулло Ҳикматуллозода ва директори генералии ҳамкории иқтисодии хориҷии Вазорати федеролии рақамӣ ва иқтисоди Ҷумҳурии Австрия, ҳамраиси қисми австриягии Комиссияи байниҳукуматии Ҷумҳурии Тоҷикистон ва Ҷумҳурии Австрия оид ба ҳамкории тиҷоратию иқтисодӣ ва саноатӣ Франс Вессиг, ки ҷиҳати иштирок дар ҷаласаи 7-уми Комиссияи номбурда дар давлати мо қарор дорад, мулоқот намуданд.

Зимни мулоқоти мазкур рушд ва тавсеаи ҳамкории дуҷониба, аз ҷумла тақвият додани фаъолияти Комиссияи байниҳукуматии Ҷумҳурии Тоҷикистон ва Ҷумҳурии Австрия оид ба ҳамкории тиҷоратию иқтисодӣ ва саноатӣ, иҷрои бандҳои дахлдори Протоколи дар доираи Комиссияи мазкур баимзорасида мавриди баррасӣ қарор гирифтанд.

Инчунин дар мулоқот ҷалби сармояи австриягӣ ба соҳаҳои кишоварзӣ, саноат, энергетика, нақлиёт, тандурустӣ, сайёҳӣ ва ғайраҳо муҳокима шуданд.