ҶАБҲАИ БУЗУРГИ СОЗАНДАГӢ ДАР ШАҲРУ ДЕҲОТИ ТОҶИКИСТОН. Дар Балҷувон 13 меҳмонхонаи муосир бунёд мешаванд

Октябрь 22, 2019 15:06

ДУШАНБЕ, 22.10.2019/АМИТ «Ховар»/. То ҷашни  30-солагии  Истиқлолияти давлатии Ҷумҳурии Тоҷикистон дар ноҳияи Балҷувони вилояти Хатлон  сохтмони  375 иншооти таъйиноти гуногун, аз ҷумла 13 меҳмонхона   ба нақша гирифта шуда, 80 фоизи он дар деҳот бунёд мешаванд. Айни ҳол аз теъдоди мазкур   42 иншоот  мавриди баҳрабардорӣ қарор гирифтаанд.

То соли 2021 дар ин ноҳия  бунёди 35 муассисаи таълимӣ, 8 кӯдакистон, 23 майдончаи варзишӣ, 3 толори варзишӣ, 2 беморхона, 20 бунгоҳи тиббӣ, 2 маркази тиббӣ, 2 дорухона, 3 нуқтаи хатнакунии кӯдакон, 13 меҳмонхона, 18 сартарошхона, як кошонаи ҳусн, 15 ҳаммом, як корхонаи коркарди шир, 3 дӯкони ҳунарҳои мардумӣ,  3 адад пул ва таъмиру навсозии 338 километр роҳ  дар назар  дошта шудааст.

Тавре  масъулини Мақомоти иҷроияи ҳокимияти давлатии ноҳияи Балҷувон ба хабарнигори АМИТ «Ховар»  хабар доданд,  давоми соли равон сохтмони  121 иншоот  ба нақша гирифта шудааст.  Барои сохтмони иншооти нақшавӣ 26 миллиону 450 ҳазор сомонӣ сармояи хусусӣ ҷалб гардидааст. Бояд  гуфт, ки  дар ноҳияи Балҷувон  бо мақсади ҷалби бештари сайёҳон айни замон аз тарафи соҳибкорони маҳаллӣ сохтмони се меҳмонхонаи  муосир  идома дорад.

Балҷувон бо табиати зебову дилфиреб дорои имкониятҳои хуби сайёҳӣ мебошад. Аз ҷумла, то имрӯз  аз мавзеъҳои тамошобоби он зиёда аз 200 нафар сайёҳон дидан намудаанд.

Бо дастуру ҳидоятҳои Асосгузори сулҳу ваҳдати миллӣ- Пешвои миллат, Президенти мамлакат муҳтарам Эмомалӣ ­Раҳмон дар ноҳияи Балҷувон корхонаҳои нефту газ, коркарди гиёҳҳои шифобахш, коркарди сангҳои маҳаллӣ ва коргоҳи дӯзандагӣ  мавриди истифода қарор гирифтанд.  Айни замон дар  ин корхонаҳои  саноатӣ   шумораи зиёди сокинони маҳаллӣ бо ҷойи кор ва маоши хуб таъмин гардидаанд. Мояи хушнудист, ки то ҷашни  таърихӣ дар ноҳияи мазкур  боз чор корхонаи саноатӣ ба истифода дода мешаванд.

Соҳаи кишоварзии ноҳияи Балҷувон низ  пешравиҳои зиёд дорад. Масалан, дар  ҳашт моҳи соли равон   ҳаҷми истеҳсоли маҳсулоти кишоварзӣ ба 117     миллиону 551 ҳазору 300 сомонӣ расонида шуд, ки нисбат ба ҳамин давраи соли гузашта 2 миллиону 723 ҳазору 300 сомонӣ зиёд мебошад. Аз ҷумла, истеҳсоли гӯшт — 2193,2 тонна, шир — 1229 тонна, тухм — 703 ҳазору 900 дона, пашм – 55,8 тонна, пилла — 1 тонна ва асал — 28, 3 тоннаро ташкил намуд.

Дар ин ноҳияи дорои заминҳои ҳосилхез дар ҷодаи  бунёд ва барқароркунии боғҳо  низ муваффақиятҳои  назаррас  ба чашм мерасанд. Боғдорони ноҳия имсол  дар майдони 58,0 гектар боғҳои нав бунёд ва дар 14,2 гектар боғҳои кӯҳнаро  аз нав барқарор намуданд.

Қомат афрохтани иншооти  муосир дар маркази ноҳияи Балҷувон симои онро ба таври шинохтанашаванда тағйир додааст. Боварамон комил аст, ки то ҷашни фархундаи Ватан — 30-солагии Истиқлолияти давлатӣ он ба гӯшаи зеботарини Тоҷикистон табдил меёбад.

Рухсораи НУР,
АМИТ «Ховар»

Октябрь 22, 2019 15:06

Хабарҳои дигари ин бахш

Ҷаласаи XVIII гурӯҳи корӣ оид ба таҳияи стандартҳои назорати давлатии молиявии мақомоти олии аудити давлатҳои аъзои ИДМ баргузор шуд
Тоҷиддин Ҷӯразода ва Абдулло Шаҳид дар Ню-Йорк вазъ ва дурнамои рушди сайёҳии Тоҷикистонро баррасӣ намуданд
БА ИСТИҚБОЛИ 35-СОЛАГИИ ИСТИҚЛОЛИ ДАВЛАТӢ. Дар ноҳияи Роштқалъа беморхонаи замонавӣ ва корхонаи коркарди пашм месозанд
Дар Тоҷикистон беш аз 70 намуд хизматрасониҳои давлатӣ дар соҳаи андоз дар шакли электронӣ ба роҳ монда шудаанд
Дар Душанбе масъалаи тақвият бахшидани ҳамкорӣ миёни Тоҷикистон ва Чин мавриди баррасӣ қарор гирифт
Дар ҷаласаи ситоди вилоятии Хатлон масъалаи содироти маҳсулоти кишоварзӣ баррасӣ шуд
МАСЛИҲАТИ МУТАХАССИС. Ҷомеаи ҷаҳон бояд ба оқибатҳои тағйирёбии иқлим мутобиқ гардонида шавад
Дар семоҳаи аввали соли 2022 аз ҳисоби андозҳо ва дигар пардохтҳои ҳатмӣ ба буҷети давлатӣ беш аз 3,5 млрд сомонӣ ворид карда шуд
БА ИСТИҚБОЛИ 35-СОЛАГИИ ИСТИҚЛОЛИ ДАВЛАТӢ. То соли 2025 дар Восеъ 25 муассисаи таълимӣ бунёд мегардад
ПАНҶСОЛАИ РУШДИ САНОАТ. Дар шаҳри Бохтар корхонаи коркарди гӯгирд мавриди истифода қарор мегирад
БА ИСТИҚБОЛИ 35-СОЛАГИИ ИСТИҚЛОЛИ ДАВЛАТӢ. Дар ноҳияи Айнӣ ба сохтмони чойхонаи миллӣ, маркази савдо ва хизматрасонӣ санги асос гузошта шуд
35-СОЛАГИИ ИСТИҚЛОЛИ ДАВЛАТӢ. Дар ноҳияи Шаҳринав 3 коргоҳи дузандагӣ ба фаъолият оғоз кард