Ҷаласаи навбатии Шӯрои ҷамъиятиву машваратии назди Хадамоти гумрук баргузор шуд

Ноябрь 30, 2019 11:05

ДУШАНБЕ, 30.11.2019 /АМИТ «Ховар»/. 29 ноябр ҷаласаи навбатии Шӯрои ҷамъиятиву машваратии Хадамоти гумруки назди Ҳукумати Ҷумҳурии Тоҷикистон доир гардид. Дар он  масъалаҳо доир ба фаъолияти Шӯро ва  Хадамоти гумрук дар соли 2019, мақомоти мазкур дар самти ҳифзи объектҳои моликияти зеҳнӣ ва тарзи истифодаи Портали савдои Тоҷикистон  мавриди баррасӣ қарор гирифтанд.

Тавре аз Хадамоти гумрук ба АМИТ «Ховар» хабар доданд, дар ҷаласа раиси Шӯро, муовини якуми сардори Хадамоти гумруки назди Ҳукумати Ҷумҳурии Тоҷикистон Азим Турсунзода  зикр кард, ки «Шӯрои ҷамъиятию машваратӣ доир ба фаъолияти гумрукӣ дар назди Хадамот бо мақсади татбиқи банди 14-и моддаи 467 Кодекси гумруки Ҷумҳурии Тоҷикистон таъсис дода шудааст. Ҳадафи он  ҳамчун мақоми ҷамъиятию машваратӣ,  пеш аз ҳама,  дар асоси ҳамкории мутақобилаи мақомоти гумрук бо аҳли тиҷорат ва саноат мусоидат намудан дар татбиқи сиёсати гумрукии Ҷумҳурии Тоҷикистон,  таъмини ҳифзи манфиатҳои иқтисодии мамлакат, ташкил намудани шароити мусоид барои фаъолияти соҳибкорӣ, такмили сохтори амалиёти содиротию воридотӣ ва ҷалб намудани сармояи хориҷӣ мебошад.

А.Турсунзода доир  ба дастовардҳое, ки мақомоти гумрук дар самти соддагардонии расмиёти савдо дар соли 2019 ба онҳо ноил гардид, маълумот дода,  аз ҷумла зикр  кард, ки Хадамоти гумрук бо мақсади мунтазам зиёд намудани ҳаҷми содироти молу маҳсулот  ба мамлакат пайваста тадбирҳои муассир  меандешад.

«Ҷиҳати тезонидани барасмиятдарории содироти маҳсулоти кишоварзӣ ба воҳидҳои сохтории тобеъ супориши қатъӣ додааст, ки ҳангоми содироти маҳсулоти ин соҳа, аз ҷумла, моли зудвайроншаванда, дар сурати ба мақомоти гумрук пешниҳод гардидани ҳуҷҷатҳои дахлдор  барасмиятдарории гумрукӣ молҳои мазкур дар навбати аввал ва ба таври соддагардонидашуда анҷом дода шаванд»,- афзуд номбурда.

Зимни ҷаласа инчунин сардори шуъбаи Раёсати ташкили назорати гумрукии Хадамоти мазкур Ёрмаҳмад Ёров дар мавзӯи «Фаъолияти мақомоти гумрук дар самти ҳифзи объектҳои моликияти зеҳнӣ» маърӯза намуд.

Ҳамчунин дар ҷаласа навори видеоӣ дар мавзӯи «Фаъолияти Портали савдои Тоҷикистон» манзури иштирокчиён гардонида шуд.

Дар ҷаласа инчунин намояндагони Вазорати фарҳанг, Академияи илмҳои Ҷумҳурии Тоҷикистон, Донишгоҳи тиҷоратии Тоҷикистон, Ассотсиатсияҳои «АВВАТ», брокерон, Ассотсиатсияи миллии занони соҳибкор «Кадбону» ва Барномаи JIZ вобаста ба ин мавзӯъ ибрози андеша намуданд.

Доир ба фаъолияти минбаъдаи Шӯрои мазкур аз ҷониби иштирокдорони ҷаласа як  зумра пешниҳоди  муҳим манзур гардид.  Пешниҳоди  маърӯза дар мавзӯи имтиёзҳо ва пардохтҳои гумрукӣ, аз ҷониби олимон оид  ба тавҳам намудани амалия ва илм дар  машваратҳои минбаъдаи Шӯро аз ҷумлаи ин пешниҳодот буданд. Инчунин таклиф шуд, ки намояндаи Агентии содироти назди Ҳукумати Ҷумҳурии Тоҷикистон ба сифати аъзо ва шахси масъули Шӯрои ҷамъиятиву машваратӣ қабул  карда шавад,  ки он аз ҷониби раиси Шӯро А.Турсунзода  ва иштирокдорони ҷаласа  дастгирӣ ёфт.

Ноябрь 30, 2019 11:05

Хабарҳои дигари ин бахш

Гурӯҳи коршиносон ба ҷаласаи шашуми СҲШ оид ба ҳифзи муҳити зист омодагӣ мегирад
Ҷаласаи Ситоди ҷумҳуриявӣ оид ба сари вақт омода намудани соҳаҳои иқтисодиёт ва иҷтимоиёти Тоҷикистон ба давраи тирамоҳу зимистон баргузор шуд
Бонки миллии Тоҷикистон ба «Mooр Стивенс» барои фаъолияти аудиторӣ иҷозатнома дод
Агентии авиатсияи гражданӣ барои ишғоли ҷойҳои кории холӣ дар «Фурудгоҳи байналмилалии Душанбе» озмун эълон менамояд
Соли 2026 Душанбе мизбони Конфронси минтақавии Созмони озуқаворӣ ва кишоварзии Созмони Милали Муттаҳид мегардад
Дар Тоҷикистон Кодекси энергетикӣ таҳия ва қабул карда мешавад
Дар корхонаи коркарди меваю сабзавоти «Насим»-и шаҳри Хоруғ 12 навъи ширинӣ аз тут истеҳсол карда мешавад
Дар Душанбе вобаста ба татбиқи Созишнома байни вазоратҳои молияи Тоҷикистон ва Федератсияи Русия конфронс баргузор гардид
Дар Душанбе татбиқи лоиҳаи «Мутобиқшавии ширхӯрон ба тағйирёбии иқлим дар Осиёи Марказӣ» баррасӣ шуд
Дар Тоҷикистон лоиҳаи «Дастрасӣ ба бозор ва мутобиқшавӣ барои чорводорӣ» амалӣ карда мешавад
Дар Шуғнон бинои нави пойгоҳи барфу гармосанҷӣ ба истифода дода шуд
Дар Мурғоб калонтарин неругоҳи офтобӣ ба истифода дода шуд