Таҷлили фарорасии Соли нав муқобили шариат нест!

Декабрь 27, 2019 10:02

ДУШАНБЕ, 27.12.2019 /АМИТ «Ховар»/. Таҷлили фарорасии Соли нави мелодӣ, агар ба дин муносибат дода нашавад, муқобили шариати Ислом нест. Дар ин бора ба хабарнигори АМИТ «Ховар» дар Кумитаи дин, танзими анъана ва ҷашну маросими назди Ҳукумати Ҷумҳурии Тоҷикистон иброз доштанд.

Тавре котиби матбуотии Кумита Афшини Муқим гуфт, Соли нав дар Ҷумҳурии Тоҷикистон ҳамасола ба сифати як ҷашни тақвимӣ таҷлил мешавад. Яъне, тоҷикистониён низ дар қатори миллионҳо нафар мусулмонон дар саросари дунё дар радифи дигар иду ҷашну маросим аз Соли нав ҳам истиқбол мекунанд.

«Мутаассифона, гурӯҳу афроде ҳастанд, ки аз таҷлили Соли нав ҳангомаҷӯӣ карда, бо ҳар баҳонае мехоҳанд ба эҳсоси диниву мазҳабии мардум нохун бизананд. Аммо воқеият ин аст, ки дар ҷомеаи мо Соли нав ҳамчун ҷашни диниву мазҳабӣ пазируфта нашуда, балки он як ҷашни тақвимӣ ё ба истилоҳ ҳисоботист, ки аз бурду бохти  соли гузашта натиҷагирӣ ва барои як соли баъдӣ барномарезӣ сурат мегирад»,-таъкид намуд ӯ.

Бино ба ақидаи котиби матбуотии Кумитаи дин, танзимит анъана ва ҷашну маросими назди Ҳукумати ҶТ, далели воқеан ҷашни тақвимӣ будани Соли нав он аст, ки дар ҷомеаи мо ҳамдигарро бо ифодаи «Соли нав муборак!» самимона табрику таҳният мегӯянд ва изҳори орзуҳои нек мекунанд. Таъбири «мелод муборак» ё ҳар ифодаи марбут ба мелоди Паёмбар Исо аслан дида намешавад. Гузашта аз ин, ба мақоми ваколатдор ҳам аз ҳеҷ гуна ташкилоту иттиҳодияҳои динӣ барои баргузории ба истилоҳ ҷашни диние дар арафаи соли нав муроҷиат нашудааст.

«Аз ин лиҳоз, — мегӯяд Афшини Муқим, — додани ҳар гуна тобиши динӣ дар масъалаи таҷлили Соли нав дар Тоҷикистон ба манфиати кор набуда, баръакс, сабаби ба миён омадани фитнаву ҳангомаҳо мегардад».

Хотиррасон мешавем, ки қаблан Раиси Шӯрои муфтиёти Федератсияи Россия шайх Равил Гайнуддин ва Роҳбари Маркази тамаддуни исломии Ҷумҳурии Ӯзбекистон шайх Абдулазиз Мансур низ дар мусоҳиба бо рӯзноманигорон иброз намуданд, ки таҷлили Соли нави мелодӣ муқобили шариати Ислом нест.

Декабрь 27, 2019 10:02

Хабарҳои дигари ин бахш

ЭЪЛОН: «ВАССОФИ ВАТАН». Барои рӯзноманигорон ва корбарони саҳифаҳои иҷтимоии шабакаҳои интернетӣ фестивал-озмун баргузор мешавад
Тандиси биринҷии чеҳраи Президенти Тоҷикистон ба Осорхонаи миллӣ супорида шуд
АЗ НАВРӮЗ ТО НАВРӮЗ. Дар Донишкадаи давлатии санъати тасвирӣ ва дизайни Тоҷикистон фестивали муд баргузор мегардад
ИМРӮЗ-РӮЗИ ҶАҲОНИИ ТЕАТР. Дар давраи соҳибистиқлолӣ дар Тоҷикистон барои пешрафти санъати касбии театрӣ шароити мусоид фароҳам оварда шуд
«САЙРИ ГУЛИ ЛОЛА». Дар Суғд Фестивали вилоятии гулҳо доир мешавад
КОНИ ЛАЗЗАТ ВА ХОНИ НЕЪМАТ. Хабарнигори АМИТ «Ховар» оид ба таомҳои наврӯзӣ дар Бадахшон маълумот ҷамъоварӣ намуд
НАВРӮЗ-МАҲБУБТАРИН ҶАШНИ МИЛЛИИ ТОҶИКОН. Суратгузориш аз таҷлили бошукуҳи ҷашни Наврӯз дар Академияи миллии илмҳои Тоҷикистон
Байни Китобхонаи миллии Тоҷикистон ва Китобхонаи оммавӣ, илмӣ-техникии шуъбаи Академияи илмҳои Русия дар минтақаи Сибир Созишномаи ҳамкорӣ ба имзо расид
Оши бурида дар Наврӯз ҳамчун рамзи умри дароз ва ҳаёти хушбахтона омода мешавад
НАВРӮЗ — ҶАШНИ ЭҲЁ. Ин ҷашни ҷаҳонӣ бунёди маънавии миллати тоҷик мебошад
МАЗМУНҲОИ НАВРӮЗӢ ДАР АШЪОРИ АҲДИ КЛАССИКИИ ФОРСУ ТОҶИК. Андешаҳои адабиётшинос дар хусус
НАВРӮЗ ДАР ЗАРАФШОН. Он бо «тухмҷангак»-и кӯдакон оғоз мегардад