Ҳаҷми маҳсулоти умумии кишоварзӣ дар вилояти Суғд ба 8 миллиарду 91,7 миллион сомонӣ расид

ДУШАНБЕ, 11.01.2019 /АМИТ «Ховар»/. Соли 2019 ҳаҷми маҳсулоти умумии кишоварзӣ дар ҳамаи бахшҳои хоҷагиҳои вилояти Суғд ба 8 миллиарду 91,7 млн сомонӣ расидааст. Ин нишондиҳанда  нисбат ба соли 2018 8,1 фоиз зиёд мебошад.

Тавре дар ин бора ба хабарнигори АМИТ «Ховар» аз хадамоти матбуоти раиси вилояти Суғд иттилоъ доданд, соли гузашта дар ҳамаи категорияҳои хоҷагӣ 331 690 тонна ғалладонагиҳо, 450 322 тонна картошка, 130 000 тонна пахта, 150  940,5 тонна меваҷот, 127 477,6 тонна полезӣ  истеҳсол гардидааст.

Бино ба иттилои манбаъ, дар хоҷагиҳои ҷамъиятӣ ва ҳоҷагиҳои деҳқонии вилоят мавсими ҷамъоварии ҳосил ба охир расид. Ҳамчунин хоҷагиҳои ҷамъиятӣ ва ҳоҷагиҳои деҳқонии вилоят дар заминҳои ҳосилаш ғундошта кишти тирамоҳиро ба охир расониданд.

Мавриди зикр аст, ки дар вилояти Суғд имрӯзҳо маъракаи яхобмонӣ ва ниҳолшинонӣ ҷараён дорад.

Ёдовар мешавем, ки вилояти Суғди Тоҷикистон яке аз минтақаҳои содиркунандаи мева ва хушкмева ба хориҷи мамлакат ба ҳисоб меравад.