Чин соли 2020 барои мубориза бо намуди нави пневмония 8,75 миллиард доллар ҷудо мекунад

ДУШАНБЕ, 28.01.2020 /АМИТ «Ховар»/. Ҳукумати Чин соли равон  барои мубориза бо намуди нави пневмония аз буҷет 60,33 миллиард юан (8,75 миллиард доллар) ҷудо мекунад. Дар ин бора рӯзи душанбе Вазорати молияи Ҷумҳурии Мардумии Чин эълон намуд, хабар медиҳад АМИТ «Ховар» бо истинод ба ТАСС.

«Чунин тадбирҳо мутобиқи қарори гурӯҳи кории мубориза бо намуди нави коронавирус, бо мақсади таъмини хароҷоте, ки барои тақвияти тадбирҳои бунёдии рафъи он заруранд, андешида мешаванд», — омадааст дар изҳороте, ки дар саҳифаи расмии вазорат нашр шудааст.

Дар он зикр гардидааст, ки ҳоло яке аз вазифаҳои асосӣ- ин пешгирии паҳншавии пневмония дар деҳот мебошад.

Тибқи омори навшуда, дар Чин шумораи шахсони гирифтори пневмония аллакай беш 4,5 ҳазор нафарро ташкил дода, 106 нафар  фавтидаанд. Аксар ҳолатҳои сироятёбӣ (1,423, 76 фавт) дар музофоти марказии Ҳубэй ва маркази маъмурии он- Вуҳан рух медиҳанд.