Кумитаи рушди маҳали назди Президенти Ҷумҳурии Тоҷикистон ба Литсейи ҳарбӣ китобҳои гуногунмазмун тақдим намуд

ДУШАНБЕ, 15.01.2020 /АМИТ «Ховар»/. Кумитаи рушди маҳали назди Президенти Ҷумҳурии Тоҷикистон 48 адад китоби гуногунмазмунро ба муҳассилини Литсейи ҳарбии Вазорати мудофиаи Ҷумҳурии Тоҷикистон тақдим намуд.

Тавре ба хабарнигори АМИТ «Ховар» аз маркази матбуоти Кумитаи рушди маҳал иттилоъ доданд, китобҳои тақдимгардида аз «Зиндагӣ аз модар сарчашма мегирад», «Ваҳдатнома», «Ваҳдат ва Истиқлолият қисми II», «Ваҳдат зевари давлати миллӣ қисми III», «Ҳафтхони Темурмалик», «Шуҷоати Спитамен», «Тулӯи Ҳақиқат» ва «Тиллои Тоҷикистон» иборат мебошанд.

Бино ба иттилои манбаъ, иқдоми мазкур вобаста ба Паёми навбатии Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, ки 26 декабри соли 2019 ба Маҷлиси Олӣ ироа шуд, амалӣ гардид.

Сарвари давлат таъкид намуд, ки «вазоратҳои маориф ва илм, фарҳанг, сохторҳои илмӣ, роҳбарони вилоятҳо, шаҳру ноҳияҳо ва муассисаҳои таълимии ҳамаи зинаҳои таҳсилот супориш дода мешавад, ки ба хотири баланд бардоштани сатҳи маънавиёти аҳолӣ чопи китобҳои бадеиро зиёд намуда, дар як сол хондани на камтар аз панҷ китоби бадеӣ ва ҳифзи асарҳои манзуму мансури адибони гузаштаву муосирро барои калонсолону хонандагон ба роҳ монанд ва иҷрои онро зери назорати қатъӣ қарор диҳанд».