Ноболиғи 15-сола бо гумони дуздӣ дастгир гардид

ДУШАНБЕ, 29.01.2020 /АМИТ «Ховар»/. Ҳангоми гузаронидани чорабиниҳои  фаврӣ — ҷустуҷӯӣ аз ҷониби кормандони милитсия  ноболиғи 15-сола, хонандаи синфи 9-уми яке аз  муассисаҳои таҳсилоти миёнаи умумии пойтахт, сокини кӯчаи Ободкорони ноҳияи Синои шаҳри Душанбе  бо гумони содир намудани кирдори дуздӣ дастгир  гардид.

Тавре аз маркази матбуоти Вазорати корҳои дохилии Ҷумҳурии Тоҷикистон ба АМИТ «Ховар»  хабар доданд, ин ноболиғи дастгиршуда ба дуздии 70 000 сомонӣ  гумонбар дониста мешавад.

Тибқи иттилои манбаъ, ба  шуъбаи  Вазорати корҳои дохилии 2 дар ноҳияи Синои шаҳри Душанбе  марди 38-солаи сокини кӯчаи Ободкорони пойтахт муроҷиат намудааст. Номбурда дар аризааш зикр кардааст, ки  5  ноябри соли 2019  шахси номаълум бо роҳи пинҳонӣ ба хонаи истиқоматиаш даромада, аз дохили сандуқи чӯбин 2 ҳазору 900 доллари амрикоӣ, 30 ҳазор сомонӣ, 70 ҳазор русӣ, ҳуҷҷатҳои ронандагӣ, 2 адад шиносномаи миллӣ ва хориҷиро дуздида, аз ҷойи ҳодиса ғайб задааст.

Аз рўи  ҳодисаи мазкур  корҳои тафтишотӣ  идома доранд.