Теъдоди беморони илтиҳоби шуш берун аз Чин ба 148 нафар расид

ДУШАНБЕ, 03.02.2020 /АМИТ «Ховар»/.  Теъдоди гирифторони  бемории илтиҳоби шуш дар хориҷи Чин,  ки барангезандаи он  навъи нави коронавирус мебошад, ба 148 нафар расид, иттилоъ медиҳад шабакаи давлатии телевизионии «CGTN», омадааст дар хабари АМИТ «Ховар» бо истинод ба «РИА Новости».

Рӯзномаи «South China Morning Post» муайян кардааст, ки 95 ҳолати сироятёбӣ дар Осиё,  берун аз Чин ба қайд гирифта шудааст. Дар Аврупо 23,  дар Амрикои Шимолӣ 13, дар Австралия  12  нафар гирифтори ин беморианд.  Қаблан дар бораи нахустин  марги берун аз Чин,  як нафар шахси дар Филипин вафот намуда маълумот дода шуд.

Дар  Гонконги Чин 15 нафар, дар Макао 8  нафар, дар Тайван 10  нафар мубталои ин беморӣ гаштаанд. Дар Чин шумораи гирифторони ин беморӣ то 17 205 нафар зиёд шуда, қурбониёни ин маризӣ  ба 361 нафар расидаанд, 475 нафари дигар  шифо ёфтаанд.