ТУТ гурӯҳи коршиносонро дар робита ба бемории коронавирус ба Чин равон намуд

ДУШАНБЕ, 10.02.2020 /АМИТ «Ховар»/. Гурӯҳи коршиносони  варзидаи Ташкилоти умумиҷаҳонии тандурустӣ  (ТУТ)  барои омӯхтани вазъияти  дар натиҷаи коронавирус пайдошуда  ба Чин рафтанд,  иттилоъ дод директори генералии  ин ташкилот  Тедрос Адхан Гебрейесус, хабар медиҳад АМИТ «Ховар». 

ТУТ охири моҳи январ эълон намуд, ки ба наздикӣ  коршиносони байналмилалӣ ба Чин рафта, ба олимони чинӣ  дар омӯхтани коронавируси нав ва роҳҳои мубориза бо он  кумак менамоянд.

«Ман худи ҳозир дар фурудгоҳ будам  ва аъзои гурӯҳи  пешбари ҳайати байналмилалии коршиносони  ТУТ  оид ба вазъияти   баамаломада дар робита ба коронавируси 2019nCov –ро ба Чин гусел намудам»,- менависад директори генералии ташкилот дар «Twitter».

Ӯ илова намуд, ки ба гурӯҳ  доктор  Брюс Эйлворд, ки дорои таҷрибаи ғанӣ дар ҳолатҳои  фавқулодаи қаблӣ  дар соҳаи тандурустӣ  мебошад, роҳбарӣ менамояд.