«Зиракии сиёсии ҷавонон дар мубориза бар зидди терроризм нақши калидӣ дорад»-бардошт аз семинари илмӣ-амалӣ дар Душанбе

Февраль 28, 2020 11:47

ДУШАНБЕ, 28.02.2020 /АМИТ «Ховар»/. Бо таъсири интернет, шабакаҳои мухталифи иҷтимоӣ ва дигар воситаҳои иттилоотӣ иддае аз ҷавонони сустиродаву ноогоҳ ба доми тазвири гурӯҳҳои манфиатҷӯ афтида, ба миллату Ватани худ хиёнат менамоянд, обрӯ ва мақоми мамлакатро дар арсаи байналмилалӣ паст мегардонанд.

Ин нукта дар  семинари илмӣ- амалӣ, ки  дар Академияи идоракунии давлатии назди Президенти Ҷумҳурии Тоҷикистон  таҳти унвони «Терроризм — таҳдид ба амнияти ҷаҳон» баргузор шуд, баён гардид.

Тавре аз Академияи мазкур ба АМИТ «Ховар» хабар доданд, дар семинар сардори раёсати илм, инноватсия ва робитаҳои байналмилалӣ Восит Салоҳиддинов, декани факултети муносибатҳои байналмилалӣ Фаридун Бобозода, мудири кафедраи технологияи иттилоотӣ ва амнияти иттилоотӣ Силмон Мавлонназаров,  намояндаи Маркази тадқиқоти стратегии назди Президенти Ҷумҳурии Тоҷикистон Фирӯз Равшаналиев, директори фонди ҷамъиятии “Ташаббуси шаҳрвандии сиёсати интернет” Муҳаммадӣ Ибодуллоев,  устодон, донишҷӯёну магистрантон иштирок ва сухан намуданд.

Силмон Мавлоназаров иброз дошт, ки терроризм ва эктремизм яке аз зуҳуроти номатлуби ҷомеаи ҷаҳонӣ ба шумор рафта, сабаби  ба миён омадани оқибатҳои нохуш, таҳдид ё истифодаи зӯроварӣ, расонидани зарари вазнини рӯҳонию ҷисмонӣ, таҷовуз ба ҳаёти инсон, бенизомӣ, тағйири сохти конститутсионии кишварҳои ҷудогона, ғасби ҳокимият, барангехтани низои миллӣ, иҷтимоӣ ва динӣ гардидааст.

Терроризм ва эктремизм дар байни табақаҳои мухталифи ҷомеа махсусан миёни ҷавонон яке аз муаммоҳои меҳварии ҳаёти башарият буда, оқибат ба бесуботи ва вайронкорӣ меорад.

Ҷумҳурии Тоҷикистон дар сафи пеши мубориза бар зидди терроризм ва эктремизм қарор дошта, онро ҳамчун вазифаи муҳимтарини таъмини амнияти миллии худ ва ҷаҳон медонад.

Фирӯз Равшаналиев изҳор дошт, ки дар ҷаҳони имрӯза кишваре нест, ки аз таъсири амалҳои гурӯҳҳои террористӣ нигарон набошад. Террор- ин таҳдид ба тамаддуни ҷаҳонӣ буда, террористон арзишҳои олии умумибашарӣ, миллӣ ва динию мазҳабиро зери по карда, бо мақсади амалӣ гардонидани ҳадафҳои ғайриинсонии худ ба зӯроварӣ, вайрону валангор намудани мероси фарҳангии бостонии халқу миллатҳо даст мезананд.

Дар марҳалаи ҳозира рушд ёфтани фаъолияти таълимоти экстремистӣ ва террористӣ аҳли ҷомеаи мамлакатро водор месозад, ки кори доимиро байни ҷавонон бо мақсади баланд бардоштани масъулияти онҳо дар таҳкими сулҳу субот, озодию истиқлолияти давлатӣ ва таъмини амният самарабахш амалӣ созем.

Рушд ва нуфузи ҳар як кишвар дар арсаи байналмилалӣ, пеш аз ҳама, ба он вобаста аст, ки ҷавонон то чӣ андоза дорои маърифати сиёсиву фарҳангӣ ва ихтисосу дониши муосир буда, ҳадафу вазифаҳои худро вобаста ба бунёди давлати ҳуқуқбунёд, демократӣ ва дунявӣ дарк менамоянд.

Муҳаммадӣ Ибодуллоев вобаста ба ҷалби ҷавонон тариқи шабакаҳои иҷтимоӣ ба гурӯҳҳои ифротӣ ибрози назар намуда, зикр  кард, ки дар шароити ташаннуҷи рӯзафзуни авзои сиёсии ҷаҳон ва тағйиру таҳаввулоти босуръати он, инчунин торафт вусъат гирифтани низоъҳои байнимазҳабӣ ва авҷи ҷиноятҳои муташаккили фаромарзӣ зиракии сиёсии ҷавонон аҳамияти бағоят бузург касб менамояд. Имрӯзҳо аз ҷониби мақомоти ҳифзи ҳуқуқ оид ба масъалаи мазкур корҳои босамар амалӣ гашта, тадбирҳои мушаххас андешида шуда истодаанд.

Дар охир изҳори умедворӣ карда шуд, ки ҷавонони шарафманди тоҷик бо дарки пойдории ваҳдату истиқлолият ва фароҳамии шароити мусоид омода ҳастанд, ки бо донишу малакаи муосир, ҷаҳонбинии васеъ ва эҳсоси баланди ватандӯстиву ифтихори миллӣ ба Тоҷикистони азизи худ хизматҳои шоиста ба ҷо оварда, ҳар гӯшаву канори онро ҳифз намоянд ва барои рушди иқтисодиёту иҷтимоиёти мамлакат ҳиссаи арзандаи худро гузоранду ҳамчун пайравони асили Пешвои миллат бошанд.

Февраль 28, 2020 11:47

Хабарҳои дигари ин бахш

Ҳамкории Кумитаи таҳсилоти ибтидоӣ ва миёнаи касбии Тоҷикистон бо муассисаҳои таҳсилоти касбии Шоҳигарии Арабистони Саудӣ баррасӣ шуд
Ҳамкории Тоҷикистон ва Иёлоти Муттаҳидаи Амрико дар соҳаи тандурустӣ баррасӣ шуд
Намояндагони ноҳияи Исмоили Сомонӣ ва як гурӯҳ модарон ба дидорбинии сарбозон рафтанд
«САҲМИ ЗАНОН ДАР РУШДИ ИЛМИ МУОСИР». Дар Душанбе конференсияи даҳуми илмӣ-ҷумҳуриявӣ доир шуд
60 ГРАНТИ ПРЕЗИДЕНТИ ТОҶИКИСТОН. Ҳунармандон метавонанд соҳиби ин грантҳо шаванд
Дар ноҳияи Синои шаҳри Душанбе озмуни шаҳрии «Кадбонуи беҳтарин» баргузор шуд
Наҷотдиҳандагони Кумитаи ҳолатҳои фавқулода ва мудофиаи граждании Тоҷикистон се нафарро аз зери тарма бароварданд
ДАСТГИРИИ ГУРӮҲҲОИ ОСЕБПАЗИРИ АҲОЛӢ. Соли 2023 корманди шуъбаҳои хизматрасонии иҷтимоӣ дар хона ба 5619 нафар ниёзманд хизмат расониданд
Соли 2023 дар вилояти Хатлон 71 ҳазору 512 ҷойи нави кор таъсис ёфт
БАРНОМАИ МОБИЛИИ «SOS». Онро Кумитаи ҳолатҳои фавқулода ва мудофиаи гражданӣ дар вазъияти фавқулода истифода менамояд
«ҶАВОНОН — ПАЙРАВИ ПЕШВОИ МИЛЛАТ». Донишҷӯёни фаъоли муассисаҳои олии мамлакат малакаи роҳбарӣ ва муошират меомӯзанд
ҲАР СОЛ ТАЪСИСИ ЗИЁДА АЗ 100 ҲАЗОР ҶОЙҲОИ КОРИИ НАВ. Соли гузашта 230 ҳазору 747 ҷойи нави корӣ, иловагӣ ва барқароршуда ба ҳисоб гирифта шудааст