Гурӯҳи кории ҳукуматӣ бо сокинони ноҳияи Ҷ. Расулов оид ба истифодаи оқилонаи заминҳои корам суҳбату мулоқотҳо доир кард

ДУШАНБЕ, 22.04.2020 /АМИТ «Ховар»/. Имрӯзҳо гурӯҳи кории ҳукуматӣ таҳти роҳбарии  Директори Агентии омори назди Президенти Ҷумҳурии Тоҷикистон Гулнора Ҳасанзода  бо мақсади тақвияти корҳои созандагию ободонӣ, вусъати раванди кишту кори баҳорӣ, андешидани тадбирҳои бетаъхиру самаранок бо ситодҳои кории ноҳиявӣ  дар ноҳияи Ҷаббор Расулов қарор  дорад. Дар ин бора АМИТ «Ховар» бо истинод ба Агентии омори назди Президенти ҷумҳурӣ хабар медиҳад.

Сафари гурӯҳи кории ҳукуматӣ ба ноҳияи Ҷаббор Расулов дар асоси Амри Президенти Ҷумҳурии Тоҷикистон ва супориши Роҳбари Дастгоҳи иҷроияи Президенти Ҷумҳурии Тоҷикистон сурат гирифтааст.

Дар ҷараёни сафар гурӯҳи кории ҳукуматӣ  бо аҳолӣ, кормандони сохторҳои маҳаллии ноҳия ва мақомоти худидоракунии шаҳрак ва деҳоти ноҳияи Ҷаббор Расулов суҳбату мулоқот  гузаронид. Дар вохӯриҳо масъалаҳои марбут ба паҳншавии бемории COVID-19 дар кишварҳои ҷаҳон, таъмини амнияти озуқаворӣ, захираи кофии маводи хӯрокӣ барои фаслҳои тирамоҳу зимистон, танзими нархи маҳсулот дар бозорҳо, истифодаи

оқилонаи заминҳои мавҷудаи корами хоҷагиҳо ва қитъаи заминҳои наздиҳавлигӣ, риояи қонуни Ҷумҳурии Тоҷикистон «Дар бораи танзими анъана  ва ҷашну маросим дар Ҷумҳурии Тоҷикистон», расонидани кумак ба оилаҳои камбизоат, маъюбону пиронсолон дар моҳи шарифи Рамазон баррасӣ гардиданд.

Сафари гурӯҳи кории ҳукуматӣ  таҳти роҳбарии  директори  Агентии омори назди Президенти Ҷумҳурии  Тоҷикистон ба ноҳияи Ҷаббор Расулов 19 апрел оғоз гардида, то 23 апрел идома меёбад.