Напардохтани маблағи шартномаи таҳсил сабаби хориҷ гардидани донишҷӯ намегардад!

Май 4, 2020 16:39

ДУШАНБЕ, 04.05.2020 /АМИТ «Ховар»/. Ба донишҷӯёне, ки бо сабаби вазъи номусоиди оилавӣ фоизи муайяни маблағи шартномаи таҳсилро насупоридаанд, имтиёз дода мешавад. Айни замон  насупоридани маблағи шартномаи таҳсили  донишҷӯ набояд садди роҳи ҷамъбасти сессияи тобистона гардад.  Донишҷӯ  дар вақти дигар бо хуб шудани вазъ дар мамлакат  ва пайдо шудани имконоти молиявӣ маблағи шартномаи таҳсилро пардохт менамояд.

Ин дастурро Вазири маориф ва илми Ҷумҳурии Тоҷикистон  Муҳаммадюсуф Имомзода зимни ҷаласаи фаврӣ ба  роҳбарони муассисаҳои таҳсилотии олии касбии ҷумҳурӣ  расонид.

Тавре  сардори маркази матбуоти Вазорати мазкур Эҳсон Сафарзода ба АМИТ «Ховар» хабар дод,  дар ҷаласаи мазкур  М.Имомзода  таъкид намуд, ки имтиҳони донишҷӯёне, ки бо сабабҳои узрнок дар имтиҳоноти хатм иштирок карда наметавонанд ба даври дигар-семестри тирамоҳӣ гузаронида шавад. Ҳамчунин қабл аз имтиҳоноти хатм, ки он то15 май ҷамъбаст мешавад, тамоми синфхонаҳои имтиҳонгирӣ безарар гардонида шаванд.

Ёдовар мешавем, ки бо қарори Ситоди ҷумҳуриявии пешгирӣ аз паҳншавӣ ва интиқоли сирояти коронавирус (CОVID-19), ки ҷаласаи он рўзи 30-юми апрели соли 2020 доир гардид, барои донишҷўёни курсҳои 1, 2 ва 3-и муассисаҳои таҳсилоти олии касбии Ҷумҳурии Тоҷикистон бинобар аз худ шудани барномаҳои таълимӣ аз 4  майи соли 2020 таътили тобистона эълон карда шуд. Имтиҳоноти тобистонаи ин донишҷўён аз рўйи рейтингҳои якум ва дуюм ҷамъбаст ва баҳогузорӣ карда мешавад.

Барои хатмкунандагони муассисаҳои таҳсилоти олии касбии Ҷумҳурии Тоҷикистон ҷамъбасти имтиҳоноти давлатии хатм то 15 майи соли 2020 пешбинӣ шудааст.

«Бо назардошти вазъи ҷойдошта дар  мамлакат бинобар аз худ шудани барномаҳои таълимӣ бо ба инобат гирифтани натиҷаи баҳои рейтингҳо баҳои ҷамъбастии донишҷўёни курсҳои 1-3 (ихтисосҳои ҳамгиро-курсҳои 1-4, ихтисосҳои тиббӣ-курсҳои 1-5) гузошта шавад»,-афзуд вазир.

Май 4, 2020 16:39

Хабарҳои дигари ин бахш

«ИЛМ-ФУРӮҒИ МАЪРИФАТ». Донишу маърифат ба аҳли башар бузургӣ ва хушбахтӣ меоранд
Президенти Тоҷикистон: «Ба хотири муаррифии ҳарчи бештари таъриху фарҳанги миллӣ сохтори алоҳидаи давлатӣ – Агентии ҳифзи мероси таърихиву фарҳангӣ таъсис додем»
Эмомалӣ Раҳмон: «Дар давраи соҳибистиқлолӣ зиёда аз 100 ёдгории таърихиву фарҳангӣ тармиму барқарор гардид»
Озмуну фестивали ҷумҳуриявии «Кадбонуи беҳтарин» ва «Сад ранги чакан» ҷамъбаст мешаванд
Дар Душанбе Мактаби байналмилалии театрии Александринский баргузор мешавад
Дар боғи фарҳангӣ-фароғатии шаҳри Истаравшан бо баландии 12 метр муҷассамаи бунёдгузори давлати тоҷикон шоҳ Исмоили Сомонӣ қомат афрохт
НАВОИ ДӮСТӢ. Дар Душанбе намояндагони Консерваторияи давлатии Узбекистон табодули таҷриба менамоянд
«ТОҶИКОНА МЕПӮШЕМ!». Ба бар намудани либоси миллӣ арҷ гузоштан ба миллату фарҳанг аст
«САД РАНГИ ЧАКАН». Дар Ҳисор даври шаҳрии фестивали ҷумҳуриявӣ ҷамъбаст гардид
«САЙРИ ГУЛИ ЛОЛА». Дар Бадахшон ин озмуни гулҳо ҷамъбаст гардид
«ТОҶИКОНА МЕПӮШЕМ!». Аз ҷониби донишҷӯёни Донишгоҳи байналмилалии забонҳои хориҷии Тоҷикистон намоиши либосҳои миллӣ баргузор шуд
«ПЕШВОИ МИЛЛАТ-ПЕШВОИ НАВРӮЗ». Таҳти ин унвон китоб ба нашр расид