Саҳмгузории вакилони мардумӣ дар мубориза бо пандемияи COVID-19

Июнь 4, 2020 13:49

ДУШАНБЕ 04.06.2020 /АМИТ «Ховар»/. Имрӯзҳо дар ҷавоб ба  даъвати башардӯстонаи Пешвои миллат муҳтарам Эмомалӣ Раҳмон кормандони вазорату идораҳо, муассисаҳо ва  соҳибкорони саховатпеша дар пешгирии паҳншавии COVID-19 ва табобати гирифторони бемории сироятии коронавирус саҳми худро гузошта истодаанд. Дар ин миён фаъолии вакилони мардумӣ низ назаррас аст.

Вазъи кунунии паҳншавии бемории сироятии коронавирус моро водор менамояд, ки дар чунин вазъияти ногувору вазнин дар паҳлӯи ҳам бошем ва то қадри имкон ба ҳамдигар дасти ёрӣ дароз намоем.

Бо пайравӣ аз сиёсати пешгирифтаи Асосгузори сулҳу ваҳдати миллӣ -Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон 1 июни соли ҷорӣ фраксияи Ҳизби аграрии Тоҷикистон дар Маҷлиси намояндагони Маҷлиси Олии Ҷумҳурии Тоҷикистон ҷиҳати дастгирии табибон ва оилаҳои ниёзманд барномаҳои хайриявӣ роҳандозӣ намуда, то имрӯз эҳсонкориҳои ин ниҳоди сиёсӣ ба 7 шаҳру навоҳии гуногуни мамлакат равона гардиданд.

Тибқи иттилои котиби матбуоти Маҷлиси намояндагони МО ҶТ  Муҳаммадато Султонов, ин иқдом дар ин рӯзҳои мушкили хуруҷи пандемияи COVID-19 болои башарият амалӣ шуда, то имрӯз шаҳру навоҳии Душанбе, Исфара, Спитамен, Темурмалик, Восеъ, Бобоҷон Ғафуров ва ноҳияи Носири Хусрав аз ин кумакҳо баҳравар шуданд.

Кумакҳо аз пасандоз ва маоши шахсии вакилону аъзои фаъоли ҳизб ва ҳамақидаҳои Ҳизби аграрии Тоҷикистон харидорӣ шуда, аз ниқобҳои гуногуни тиббӣ, дастпӯшҳо, либосҳои махсуси муҳофизатӣ, айнакҳои тиббӣ, маҳлулҳои назофатию антисептикӣ ва маводи ғизоӣ иборат мебошанд. Инчунин ба оилаҳои ниёзманд ва ашхоси бемор, ки ниёз ба табобат доранд, як миқдор маблағ низ ҳамчун кумак расонда шуданд.

— Дар чунин шароите, ки боиси носуботии иқтисодию иҷтимоии сайёра гардидааст, мо вазифаи инсонии худ медонем, ки новобаста аз мавқеи ҳизбӣ дар раванди мубориза бо ин бемории сироятӣ дар паҳлӯи миллату давлати худ бошем, таъкид менамояд раиси Ҳизби аграрии Тоҷикистон Рустам Латифзода.

Ҳамзамон номбурда зикр намуд, ки аъзои Ҳизби аграрии Тоҷикистон барномаҳои ҳукумат ва махсусан иқдомҳои Пешвои миллатро, ки дар самти  мубориза бар зидди бемории COVID-19 ва таъмини аҳолӣ бо маводи доруворию озуқа татбиқ мешаванд, комилан дастгирӣ намуда,  кӯшиш менамоянд, ки дар чунин шароити ҳассос дар паҳлӯи мардуми худ бошанд ва бо ҳар восита кумаку дастгирии худро ба табибон ва оилаҳои ниёзманд равона намоянд.

Қобили қайд аст, намояндаи дигари мардумӣ дар Маҷлиси намояндагони Маҷлиси Олии Ҷумҳурии Тоҷикистон Солеҳа Холмаҳмадзода  29 майи соли равон аз Беморхонаи марказии шаҳрии Турсунзода боздид намуда, бо вазъи хизматрасонии тиббӣ ба беморони гирифтори коронавирус (СОVID-19) ва шароити кории кормандони соҳаи тандурустӣ шинос шуд. Зимни суҳбат бо кормандони соҳаи тандурустӣ Солеҳа Холмаҳмадзода иброз дошт, ки барои пешгирии паҳншавии беморӣ дар мамлакат Ситоди ҷумҳуриявӣ амал намуда, ниҳоди марбутаи тандурустӣ шабонарӯзӣ дар хизмат қарор доранд. Аз ҷумла таъкид гардид, ки Пешвои миллат муҳтарам Эмомалӣ Раҳмон заҳматҳои беандоза ва фидокориҳои имрӯзаи табибонро оид ба пешгирӣ намудани коронавирус баланд баҳогузорӣ намуда, ба онҳо арзи сипос намуданд.

-Аз ин лиҳоз кормандони соҳаи тандурустиро мебояд эътимоди муҳтарам Пешвои миллатро сазовор шуда, ҷиҳати баланд бардоштани сифати табобат ва хизматрасонии тиббӣ беш аз пеш кӯшиш намоянд,-иброз дошт Солеҳа Холмаҳмадзода

Вакили Маҷлиси намояндагон ҳамчунин таъкид намуд, ки ба қайд гирифтани беморӣ набояд мардуми моро ба таҳлука орад. Моро мебояд дар ҳамдастӣ зидди ин сироят мубориза барем, бо риояи тавсияи духтурон ҷиҳати таъмини амнияти озуқавории оила ва пеш бурдани зиндагонӣ меҳнат намоем.

Баъдан аз ҷониби оилаи Холмаҳмадзодаҳо ба кормандони соҳаи тиб бо мақсади дастгирии моддӣ ва ороиши дастархон кумаки моддӣ, аз қабили орд, равған макарон, шакар ва сабзавоту меваҷот расонида шуд.

Июнь 4, 2020 13:49

Хабарҳои дигари ин бахш

Ғолибони озмунҳои ҷумҳуриявии «Ҳамсари беҳтарин» ва «Фарзанд-боғи падару модар» муайян гардиданд
Ягона роҳи пешгирии бемории сурхча ва гулафшон иммунизатсия мебошад
Дар беш аз 400 муассисаи тандурустии Тоҷикистон воситаҳо барои пардохти электронӣ насб гардиданд
Дар шаҳри Турсунзода биноҳои Маркази касбомӯзӣ ва раёсати Агентии меҳнат ва шуғли аҳолӣ бунёд мегарданд
Озмунҳои ҷумҳуриявии «Беҳтарин ҳамсар» ва «Фарзанд-боғи падару модар» ҷамъбаст мегарданд
Ҷаласаи V Шурои ҳамоҳангсози мақомоти ваколатдори давлатҳои аъзои СААД баргузор гардид
Дар Тоҷикистон ҳавои фасли тирамоҳ чӣ гуна мешавад?
Дар Коллеҷи технологии шаҳри Душанбе 5 синфхонаи иловагӣ ба истифода дода мешавад
Дар назди Коллеҷи тиббии ҷумҳуриявӣ бинои нави клиника ва дармонгоҳ бунёд мегардад
Соли равон 37 муассисаи таҳсилоти ибтидоии касбӣ таъмир ва навсозӣ мегардад
Кормандони Кумита оид ба таҳсилоти ибтидоӣ ва миёнаи касбӣ суханронии Сарвари давлатро ба муносибати Рӯзи дониш якҷоя тамошо намуданд
Ба намояндагони касбу кори гуногуни вилояти Хатлон мукофотҳои давлатӣ тақдим карда шуд