Ба дунболи Канада ва Россия Тоҷикистон наворбардории филмро дар бораи пандемияи коронавирус ба нақша гирифтааст

Июль 24, 2020 10:34

ДУШАНБЕ, 24.07.2020 /АМИТ «Ховар»/. Ба наздикӣ озмуни таҳияи сенарияи беҳтарин оид ба пандемияи коронавируси COVID-19 эълон мешавад. Дар ин бора дирӯз, 23 июл, директори Киностудияи давлатии «Тоҷикфилм» Маҳмадсаид Шоҳиён изҳор дошт.

«Мо барои таҳияи филм зери унвони кории COVID-19 озмун эълон мекунем ва пас аз интихоби сенарияи беҳтарин фавран ба наворбардории филм шурӯъ мекунем», — гуфт М.Шоҳиён.

Дар ташреҳи ин тасмим мавсуф илова намуд, ки киностудия «кӯшиш мекунад, ки ин лаҳзаҳои фоҷиабори ҳаётро сабт кунад, филме таҳия кунад, ки ҳолати кунунии густариши беморӣ ва вазъиятро инъикос кунад, зеро ҳама медонанд, ки чӣ гуна коронавирус иқтисодиёти ҳама кишварҳоро фалаҷ намудааст”.

Тавре АМИТ «Ховар» қаблан хабар дода буд, чанде пештар коргардони канадагии эронитабор Мустафо Кишварӣ нахустин филми бадеиро оид ба коронавирус зери унвони «Корона» ба навор гирифта буд. Ҳаводиси муҳит Кишвариро чунон мутаассир намуданд, ки худи ӯ ҳам сенария навишт, ҳам филмро наворбардорӣ, танзим ва коргардонӣ намуд.

«Корона» триллери равонӣ мебошад,  даҳшат, залолат ва равандҳои вобаста ба зуҳури эпидемияро дар ҷомеа инъикос менамояд. Шаш ҳамсоя ва як шахси ношинос дар лифт банд мемонанд: ҷуфти сафедпӯст, як мусалмони олимақоми африқоӣ — амрикоинажод, байкери миллатгаро, ки дар пешониаш салиб холкӯбӣ шудааст, духтари эҳтимолан ҳиндутабор, ҷавони мушобеҳ ба яҳудиҳо ва як зани чинӣ. Ҳодисаҳои филм дар ҳамин рӯзҳо, вақте ки COVID-19 дар ҷаҳон туғён мекунад, сурат мегиранд. Замоне ки зани осиёӣ дар дохили лифт сулфа мекунад, ҳараҷу мараҷ ва кашмакаш шурӯъ мешавад, тақрибан ба мисли филми «Пила».

«Вирус одамонро аз рӯи нажоди онҳо интихоб намекунад, пас чаро мо бояд як миллатро нисбат ба миллати дигар бадтар ҳисоб кунем? — мепурсад Кишварӣ. Дар филм масъалаҳои тарсу ҳарос ва ахлоқӣ тасвир шудаанд. Имрӯз мо ҳама дар ин лифт банд мондаем».

Илова бар ин киностудияи ба номи М. Горкий эълон намудааст, ки наворгирии филми ҳуҷҷатии телевизионии силсилавиро бо номи «ВиРус» шурӯъ менамояд. Қаҳрамонони он пандемияи  ҷаҳонӣ ва касоне, ки бо он муқовимат мекунанд, хоҳанд буд, — дар ин хусус моҳи марти соли равон ТАСС хабар дода буд. Филм дар асоси ёддоштҳо ва навиштаҷоти рӯзмарраи шахсоне, ки худро ихтиёран карантин кардаанд, таҳия мешавад.

Коргардони филм Алексей Кобилков бар ин назар аст, ки танҳо тавассути таассурот ва эҳсосоти шахсӣ лаҳзаи таърихиро сабт намудан мумкин аст, чунки инсоният бо чунин бемории рӯҳии ҳамагонӣ  қаблан мувоҷеҳ нашуда буд. Дунё қаблан барои ҷаҳонишавӣ талош мекард, ҳоло барои инзивои миллӣ. Марзҳо баста мешаванд, иртиботи ҳавоӣ қатъ мешавад ва танҳо Интернет ягона воситаи алоқа боқӣ мемонад …

 

 ДАР АКС: лаҳзае аз филми «Корона»

Июль 24, 2020 10:34

Хабарҳои дигари ин бахш

22 июл дар Тоҷикистон нишастҳои матбуотии вазорату идораҳо оғоз мегарданд
Сайёҳон ба воситаи аудиошунавоӣ бо мавзеъҳои таърихиву фарҳангии шаҳри Хуҷанд шинос мешаванд
«ТОҶИКИСТОН-ВАТАНИ АЗИЗИ МАН». Ба даври сеюми ин озмуни ҷумҳуриявӣ 525 довталаб роҳхат гирифт
Бахшида ба 100-солагии адабиётшиноси маъруфи тоҷик Соҳиб Табаров ҳамоишу маҳфилҳои илмӣ-адабӣ доир мешаванд
Донишкадаи умумирусиягии кинематографияи ба номи Сергей Герасимови шаҳри Москва қабули довталабонро эълон намуд
«Нурворизм» ва «Танворизм» -«Ду равияи як рассом». Дар Осорхонаи миллӣ намоиши асарҳои рассом Зокир Собиров ифтитоҳ гардид
Коллеҷи хореографӣ ба номи Малика Собирова дар соли нави хониш ба истифода дода мешавад
«ТОҶИКОНА МЕПӮШЕМ». Ҳадафи ин иқдом тарғиби либоси миллӣ ва ҷалби тарроҳон ба муосиргардонии он мебошад
«САҲМИ ИБНИ СИНО ДАР ТАШАККУЛИ ТИББИ ҚАДИМ ВА МУОСИР: ОСОРИ ИЛМӢ, ТАҶРИБА ВА НАЗАРИЯ». Таҳти ин унвон дар Русия озмуни мақолаи беҳтарин эълон гардид
Филми «Дар талоши ҳақиқат» аввалин маротиба дар синамоҷашнвораи «Дебют»-и Амрико иштирок мекунад
Агентии миллии иттилоотии Тоҷикистон «Ховар» ҳамкориро бо рӯзномаи «Жэнмин Жибао»-и Чин тақвият мебахшад
Байни Агентии миллии иттилоотии Тоҷикистон «Ховар» ва Медиакорпоратсияи «CMG»-и Чин Ёддошти тафоҳуми ҳамкорӣ ба имзо расид