«Ҷанбаҳои гендерӣ дар фаъолияти соҳа»-таҳти чунин унвон барои литсейҳои касбии техникӣ ҳамоиш баргузор гардид

ДУШАНБЕ, 24.08.2020 /АМИТ «Ховар»/. Дар доираи Лоиҳаи «Тақвияти таҳсилоти касбӣ-техникӣ ва омӯзиш»-и Вазорати меҳнат, муҳоҷират ва шуғли аҳолии Ҷумҳурии Тоҷикистон дар мавзӯи «Ҷанбаҳои гендерӣ дар фаъолияти соҳа» барои аъзои Кумитаи машваратии соҳавии назди  муассисаҳои таълимии литсейҳои  касбии техникии шаҳри Душанбе ҳамоиш баргузор гардид. Дар ин бора ба хабарнигори АМИТ «Ховар» аз маркази матбуоти Вазорати меҳнат, муҳоҷират ва шуғли аҳолии Ҷумҳурии Тоҷикистон иттилоъ доданд.

Зимни баргузории машварат мутахассисони Гурӯҳи идоракунии лоиҳа,  коршиносон, намояндагони Раёсати таҳсилоти ибтидоии касбӣ ва таълими калонсолони вазорат, Агентии меҳнат ва шуғли аҳолӣ дар  вилоятҳои Суғду Хатлон ва шаҳри Душанбе ва дар маҷмӯъ, 140 нафар ширкат намуданд, ки 57 нафарашон занон буданд.

Зимни машварат татбиқи сиёсати гендерӣ дар шаҳру ноҳияҳои Ҷумҳурии Тоҷикистон, вазъи занон дар бозори меҳнати мамлакат ва нақши онҳо дар рушди иқтисоди оила, методологияи таълим дар асоси салоҳият, нақши Кумитаи машваратии соҳавӣ дар таҳкими системаи лоиҳаи «Тақвияти таҳсилоти касбӣ-техникӣ ва омӯзиш»  ва механизми дарёфти роҳҳои тавонмандсозии  Кумитаи машваратии соҳавӣ баррасӣ гардид.

Ҳадафҳои асосии Лоиҳа- ворид намудани навоварӣ дар методологияи омодасозии мутахассисон барои истеҳсолоти миллии Ҷумҳурии Тоҷикистон мебошад.

Ҳамчунин Лоиҳа барои мустаҳкам намудани заминаҳои моддӣ-теникӣ ва барқарорсозии инфрасохторҳои литсейҳои касбии техникӣ ва марказҳои таълими калонсолони Тоҷикистон, дастрасии баробар ба барномаҳои таълимӣ ва тақвияти идоракунию роҳбарӣ дар системаи таҳсилоти ибтидоии касбӣ-техникии  Вазорати меҳнат, муҳоҷират ва шуғли аҳолии Ҷумҳурии Тоҷикистон ва ба ин восита, омода намудани мутахассисони баландихтисоси ҷавобгӯ ба талаботи бозори меҳнат мусоидат менамояд.