ҲАҚҚИ УСТОД АЗ ПАДАР БЕШ АСТ! Муҳандисони рӯҳи инсон имрӯз ид доранд!

Октябрь 4, 2020 08:56

ДУШАНБЕ, 04.10.2020 /АМИТ «Ховар»/. Ҳамасола якшанбеи аввали моҳи октябр, ҳамчун рамзи эҳтиром ба аҳли таълиму тарбия дар Тоҷикистони соҳибистиқлол Рӯзи омӯзгорон таҷлил мегардад. Имсол аз таҷлили Рӯзи омӯзгорон дар мамлакат 25 сол сипарӣ гардид, зеро он бори аввал 3 ноябри соли 1995 таҷлил гардида  буд. Рӯзи муаллимон ҳамсасола дар Тоҷикистон бо шукуҳу шаҳомати хосса ҷашн гирифта мешавад, ки ин аз мақому мартабаи болои  омӯзгорон дар ҷомеа шаҳодат медиҳад.

Ба ин муносибат дар паёми табрикии Вазири маориф ва илми Ҷумҳурии Тоҷикистон Муҳаммадюсуф Имомзода чунин омадааст: «Ба соҳаҳои маориф ва илм таваҷҷуҳи махсус зоҳир кардани Ҳукумати Ҷумҳурии Тоҷикистон, бахусус  Пешвои миллат муҳтарам Эмомалӣ Раҳмон боиси ифтихору шукргузории мо – кормадони соҳаи маориф ва илм мебошад. Маҳз ҳамин таваҷҷуҳи ҳамешагист, ки омӯзгор дар ҷомеаи мо рӯз ба рӯз ва сол то сол ҷойгоҳу мақоми хоссаро касб мекунад. Тавре аз саҳифаҳои таърих бармеояд, дар фарҳанги миллии мо эҳтироми мардум ба пешаи омӯзгорӣ арзишманд маҳсуб мешавад. Ин ба он маъност, ки мардуми фарҳангдӯсту соҳибкитоби мо табиатан ба ҳар фарде, ки аз илму адаб, таълиму тарбия ва омӯзишу парвариш бархӯрдор аст, эҳтиром мегузоранд. Дарвоқеъ, пешаи омӯзгорӣ дар ҳама давру замон кори пурифтихору пуршараф буду ҳаст ва мемонад. Вобаста ба ҳамин  Пешвои миллат, муҳтарам Эмомалӣ Раҳмон таъкид кардаанд, ки «Пешаи омӯзгорӣ муқаддастарин касби рӯи олам аст. Бедории фикр, покизагии ахлоқ ва ташаккули ақлонии инсон маҳсули ранҷу машаққати омӯзгорон мебошад. Гузаштагони бузурги мо фармудаанд, ки равшанкунандаи хиради башар ва афрӯзандаи машъали илму донишу тавоноӣ омӯзгор, муаллим ва устод аст». Гузашта аз ин, бузургони илму адабамон низ дар тавсифу ситоиши омӯзгор ҳамчун раҳнамову роҳкушо суханҳои пурқимат гуфтаанд. Аз ҷумла, Камоллидини Биноӣ дар қитъаи машҳури худ мартабаи омӯзгор ва ё ҳаққи устодро аз падар боло медонад:

Ҳаққи устод аз падар беш аст,
В-аз падар устод дар пеш аст.
Гар падар аз ҳаёт баҳра диҳад,
Устод аз наҷот баҳра диҳад.

Вазири маориф ва илми Ҷумҳурии Тоҷикистон Муҳаммадюсуф Имомзода  дар идомаи паёми табрикӣ зикр менамояд, ки  бо шарофати соҳибистиқлолии Тоҷикистон дар кору фаъолияти омӯзгорон фазои наву мустақилият ворид гашт, омӯзгорон машғулиятҳои худро бо андешаҳои миллӣ мувофиқ карданд, ки дар тарбияи худшиносии насли наврас ва ҷавонон имконияти бештар фароҳам омад.

-Маҳз иҷрои вазифаҳои бузург мақому манзалати омӯзгоронро дар ҷомеаи мо болотар намуда, талошҳои онҳо дар назди давлат эътибори бештар пайдо кард. Қабули қонунҳои соҳавӣ, барномаҳои давлатӣ, стандартҳо барои ҳамагуна зинаҳои таҳсилот, бунёду таъмири муассисаҳои таълимӣ, ҳамасола баланд шудани музди меҳнати кормандони соҳаи маориф, ҳавасмандгардонии онҳо дар робита бо ҳамкориҳои судманди падару модар ва ҷомеа, қадршиносии онҳо бо ҷоизаҳои давлатӣ ва мукофотҳои соҳавӣ аз ҷумлаи ташаббусҳоеанд, ки бо мақсади дастгирии омӯзгорон ва беҳтар шудани фаъолияти онҳо нигаронида шудаанд. Яке аз охирин иқдом дар ин самт аз 1 сентябри соли равон 15 дарсад зиёд шудани маоши омӯзгорон бо ташаббуси Пешвои миллат, муҳтарам Эмомалӣ Раҳмон мебошад. Ҳамчунин, иштироки Пешвои миллат, муҳтарам Эмомалӣ Раҳмон дар оғози соли нави таҳсил дар Рӯзи дониш ва Дарси сулҳ, суханрониҳо дар ифтитоҳи муассисаҳои таълимӣ боиси рӯҳбаландии аҳли маорифи кишвар мегардад, -афзуд Муҳаммадюсуф Имомзода.

Муҳаммадюсуф Имомзода таъкид намудааст, ки замони муосир дар назди ҳар нафари аҳли маориф талаботи навро мегузорад ва аз ин рӯ, моро зарур аст, ки ҳамқадами замон гардида, дар вусъати ислоҳоти соҳа, аз ҷумла, баланд бардоштани сифати таълим, истифодаи усулҳои фаъоли таълим, пешниҳоди дастурҳои методӣ ва тайёр кардани шогирдони забондону мусаллаҳ бо донишҳои техникиву технологии муосир ва мувофиқ ба меъёрҳои байналмилалии таҳсилот масъулияти бештар дошта бошем. Ҳамчунин, дар иҷрои нақшаҳои дарпешистода, аз ҷумла, сазовор таҷлил намудани ҷашни 30 – солагии Истиқлоли давлатии Ҷумҳурии Тоҷикистон ва инкишофу таҳкими илмҳои бунёдӣ дар заминаи «Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи маориф ва илм» саҳми босазо гузорем.

Иди касбӣ – Рӯзи омӯзгорон  муборак, устодону омӯзгорони азиз!

ДАР АКС: омӯзгори фанни забони англисии литсейи математикии №1-и шаҳри Хуҷанд, ғолиби озмуни «Омӯзгори соли Тоҷикистон-2019»  

 

Октябрь 4, 2020 08:56

Хабарҳои дигари ин бахш

«ҶАҲОНРО БА ДОНИШ ТАВОН ЁФТАН…». Андешаҳо дар ҳошияи таъкидҳои Президенти Тоҷикистон дар мулоқот бо фаъолон, намояндагони ҷомеа ва ходимони дин
«ТОҶИКИСТОН-ПЕШОҲАНГИ ҲИФЗИ ПИРЯХҲО ДАР ҶАҲОН». Таҳти ин унвон дар Душанбе конференсияи ҷумҳуриявии илмӣ-амалӣ баргузор шуд
ЭЪЛОН! 14 ва 15 март мулоқоти Президенти Ҷумҳурии Тоҷикистон бо намояндагони фаъоли ҷомеа ва ходимони дин аз тариқи ҳамаи шабакаҳои телевизионӣ ва радиоӣ такроран пахш карда мешавад
НАЗАРИ КОРШИНОС. Масъалаи дарки манфиати миллӣ ва ҳимояи он аз тамоми ҷомеа, хосса ходимони дин дониши баланди сиёсӣ талаб менамояд
РАВАНДИ ОБИ ДУШАНБЕ. ЮНИСЕФ ният дорад, ки дар Тоҷикистон шабакаи «Ҷавонон барои захираҳои об ва иқлим» таъсис диҳад
Сарвари давлат занон-модаронро ба сарфаю сариштакорӣ ва пешгирӣ аз зиёдаравию исрофкорӣ даъват намуданд
МОДАР АВВАЛИН МУРАББИИ БАШАРИЯТ АСТ. Президенти Тоҷикистон муҳтарам Эмомалӣ Раҳмон дар васфи Зан-Модар
БО ДУОИ ТУ ДАР ИН ДУНЁ САОДАТ ЁФТАМ! Эҳдо ба Рӯзи Модар
Президенти Тоҷикистон орзу намуданд, ки ягон модар доғи фарзанд набинад ва ашки ғам нарезад
СИРИШТИ МОДАРОН АЗ МЕҲРУБОНӢ АСТ. Фармудаҳои бузургон дар ситоиши ин олиҳаи зиндагӣ
СИЁСАТИ МОДАРДӮСТОНАИ ПЕШВОИ МИЛЛАТ. Профессор Махфират Хидирзода: «Дар замони соҳибистиқлолӣ беш аз 256 ҳазор нафар духтарон муассисаҳои таҳсилоти олиро хатм кардаанд»
Эмомалӣ Раҳмон: «Имрӯз занону духтарон дар тамоми самтҳои ҳаёти ҷомеа ва давлат саҳми арзишманд мегузоранд»