Дар Душанбе боз 100 адад троллейбусҳои муосири истеҳсоли ширкати «Белкоммунмаш» ба мусофирон хизмат мерасонанд

Октябрь 13, 2020 14:42

ДУШАНБЕ, 13.10.2020 /АМИТ «Ховар»/. То охири соли равон дар хатсайрҳ ои  шаҳри Душанбе боз 100 адад троллейбусҳои муосири тамғаи 321 00 D, ки истеҳсоли  ширкати «Белкоммунмаш»-и Ҷумҳурии Беларус мебошанд, ба сокинон ва меҳмонони пойтахт хизмат мерасонанд. Айни замон 60 адад троллейбусҳои муосир  ба  шаҳр ворид гардида, моҳи декабри соли равон дастрасии 40 адади дигари он пешбинӣ шудааст. Ҳамзамон мақомоти иҷроияи ҳокимияти давлатии шаҳри Душанбе харидории 300 адад автобусҳои муосир, аз ҷумла автобусҳои дуқабатаро дар нақша дорад. Иқдоми харидории троллейбусҳои нав баъди аз озмоиш гузаштани 4 адад троллейбусҳои истеҳсоли ширкати мазкур, ки моҳи майи соли гузашта ба Душанбе оварда шуда буданд, сурат гирифтааст. Дар ин бора аз Раёсати иттилоот ва робитаҳои хориҷиии дастгоҳи Раиси шаҳри Душанбе ба АМИТ «Ховар» хабар доданд.

«Ин троллейбусҳои муосир бо супориши Раиси шаҳри Душанбе муҳтарам Рустами Эмомалӣ  дар минтақаи Осиёи Марказӣ бори аввал ба шаҳри Душанбе оварда шудаанд. Онҳо аз лиҳози харҷи камтари неруи барқ, сатҳу сифати хизматрасонӣ ва ҳаракат дар тамоми ҳолату шароити шаҳр аз тамғаҳои қаблӣ  бартарияти зиёд доранд. Мусофиркаши мазкур  бо истифода аз технологияи пешрафта истеҳсол гардида, дорои муҳаррики қувваи ҷараёни тағйирёбандаи қабулкунанда ва батареяҳои литий барои захираи неруи барқ мебошанд. Ин имкон медиҳад, ки ҳангоми ҳаракат тавассути ноқил троллейбус дар таҷҳизоти худ неруи барқро захира намуда, дар ҳолати зарурӣ то масофаи 15 -20 километр бе ноқил ҳаракат намояд», — афзуд манбаъ.

Арзиши як адад чунин троллейбус қариб 250 ҳазор доллари америкоиро  ташкил медиҳад. Троллейбусҳои муосир иқтидори ғунҷоиши то 90 нафар мусофирро дошта, аз 22 ҷойи нишаст, лавҳаҳои иттилоотӣ, воситаҳои огоҳкунӣ аз ҷониби мусофирон дар дохил ва беруни он, инчунин низоми мушоҳидавии дохилӣ бо 8 адад камера иборатанд, ки барои фаъолияти ронандагон мувофиқ мебошанд.

Ҳамчунин барои даромаду баромади мусофирон дар он низоми «книлинг» насб гардидааст, ки дар ҳолати зарурӣ даромадгоҳи троллейбус ба воситаи дастгоҳи идоракунӣ аз ҷониби ронанда паст ва баланд карда мешавад.

Барои нафарони дорои имкониятҳои маҳдуд дар даромадгоҳи мобайн таҷҳизоти «аппарел» насб гардидааст, ки тавассути он даромадгоҳ то сатҳи зарурӣ поёну боло карда мешавад.

Бояд зикр кард, ки троллейбусҳои истеҳсолнамудаи ширкати «Белкоммунмаш» дар ҳамаи минтақаҳои  Беларус фаъол буда,  инчунин ширкат бо Қирғизистон, Россия, Украина, Молдова, Руминия, Сербия, Аргентина, Колумбия ва дигар мамлакатҳои Америкаи Лотинӣ ҳамкории густурда ба роҳ мондааст.

Мақсад аз ворид намудани чунин нақлиёти замонавӣ ба шаҳри Душанбе — кам кардани танбашавии ҳаракат дар роҳҳои пойтахт мебошад.

Ёдовар мешавем, ки дар  кӯчаи марказии пойтахти Тоҷикистон – хиёбони Рӯдакии  шаҳри Душанбе  нахустин маротиба 1 майи соли 1955  троллейбусҳои аввалин ба ҳаракат даромада буданд.

Хотиррасон менамоем, ки барои навсозии инфрасохтори  троллейбусҳои  шаҳри Душанбе  Бонки Аврупоии Таҷдид ва Рушд (БАТР) 8 миллион доллар ҷудо намуд, ки  маблағи мазкур  барои таъмири зеристгоҳҳои мавҷуда, насби ноқилҳои фидерӣ, инчунин хатҳои троллейбус ва пойгоҳҳои он равона  гардидааст.

Барқарорсозии инфрасохтори троллейбусҳо ба  рушди соҳа ва беҳтар гардидани фаъолияти  ин воситаи мусофиркаш  мусоидат карда, имкон  фароҳам меорад, ки сокинону меҳмонони пойтахт аз хизматрасонии ин нақлиёти каммасрафи ҷамъиятӣ ва аз лиҳози экологӣ тоза бештар истифода баранд.

  Рухсораи НУР,
АМИТ “Ховар”

Октябрь 13, 2020 14:42

Хабарҳои дигари ин бахш

Дар Душанбе мавсими интиқоли гармӣ оғоз шуд
Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе Рустами Эмомалӣ ба номзади арзанда овоз доданд
Ярмарка-фурӯшгоҳҳои Душанбе фаъолтар мегарданд
Дар Душанбе автобуси дуқабата ба хизматрасонии мусофирон оғоз намуданд
«САРҲАДИ ТОҶИК ЗАБОНИ ТОҶИК АСТ…». Мулоҳизаҳои узви Комиссия оид ба татбиқи Қонуни забони давлатӣ дар шаҳри Душанбе
АЗ ШАҲДИ АНГУР ТО ГУЛИ АСАЛ. Имрӯз дар Бозори «Меҳргон»-и Душанбе Фестивал-намоиши фурӯши асал, озмуни ангур ва дигар анвои меваҷот доир гардид
Дар Душанбе таҳти унвони «Ҷонибдории Эмомалӣ Раҳмон дар интихобот – кафили саодати мардум ва рушди босуботи мамлакат» ҳамоиш доир шуд
Пагоҳ дар Бозори «Меҳргон»-и Душанбе Фестивал-намоиши фурӯши асал, озмуни ангур ва дигар анвои меваҷот доир мегардад
Дар Душанбе Рӯзи даъватшаванда доир гардид
Иқдоми «шаҳри сабз»-и Рустами Эмомалӣ Душанбеи гулпӯшро боз ҳам хуррамтар мегардонад
Дар Душанбе корхонаи муштараки истеҳсоли техникаи маишии «Артел Авесто Электроникс» ба истифода дода шуд
ҲАМОВОЗӢ БА ДАЪВАТИ РАИСИ ШАҲР. Ташаббусҳои созандаи Рустами Эмомалӣ ба маҳбубияти ў дар қалби мардум замина гузоштаанд