ФУТЗАЛ. Дастаи «Сипар» дар сурати ба даст овардани як пирӯзии дигар унвони чемпиони Тоҷикистонро соҳиб мешавад
![](https://khovar.tj/wp-content/uploads/2020/10/fffffffff.jpg)
ДУШАНБЕ, 19.10.2020. /АМИТ «Ховар»/. Дастаи футзали «Сипар»-и шаҳри Хуҷанд бар дастаи «Соро компания»-и шаҳри Душанбе дар ду силсилабозиҳои финали Лигаи касбии футзали Тоҷикистон -2020 ғалаба карда, ба дарёфти унвони чемпионӣ наздик шуд. Бозии навбатии дастаҳо 24 октябр сурат гирифта, «Соро компания» дар шаҳри Душанбе дастаи «Сипар»-ро қабул мекунад. Дар ин бора шореҳи варзиши АМИТ «Ховар» Меҳрони Қурбон бо истинод ба Федератсияи футболи Тоҷикистон иттилоъ медиҳад.
Бозии аввали дастаҳо бо ҳисоби мусовӣ (1:1) анҷом ёфт, вале дар задани силсилаи зарбаҳои ёздаҳметра бахти дастаи футзали «Сипар»-и шаҳри Хуҷанд омад карду бо ҳисоби 4:3 ғолиб омад. Дар бозии дуюм дастаи «Сипар» бо ҳисоби 6:2 бар дастаи «Соро компания»-и шаҳри Душанбе ғалаба кард. Ҳарду бозии аввал дар шаҳри Хуҷанд баргузор шуданд. Ҳамин тариқ, дастаи футзали «Сипар»-и шаҳри Хуҷанд дар силсилаи бозиҳо бо ҳисоби 2:0 пешсаф аст ва пас аз як ғалабаи дигар аввалин бор чемпион хоҳад шуд.
Ёдовар мешавем, ки дар ду бозӣ барои ҷои сеюм дастаи «Муҳоҷир»-и шаҳри Душанбе бар дастаи «Истаравшан» ғалаба кард – дар бозии аввал бо ҳисоби 8:5, дар бозии дуюм бо ҳисоби 6:5. Футболбозони дастаи «Муҳоҷир»-и шаҳри Душанбе дар силсилаи бозиҳо барои ҷои сеюм бо ҳисоби 2:0 пешсафанд ва мумкин аст дар бозии навбатӣ медалҳои биринҷии Лигаи касбии футзали Тоҷикистонро ба даст оранд.