Дар раддабандии КФО «Истиқлол» ба қатори 50 дастаи беҳтарин дохил шуд

ДУШАНБЕ, 24.11.2020. /АМИТ «Ховар»/. Конфедератсияи футболи Осиё раддабандии нави дастаҳоро муайян намуд, ки дар он дастаҳои  мунтахаби Тоҷикистон мавқеи худро беҳтар карданд. Чемпиони Тоҷикистон — дастаи футболи «Истиқлол»-и  шаҳри Душанбе ба қатори 50 дастаи беҳтарин дохил шуд. Дар ин бора  шореҳи  варзиши АМИТ «Ховар» бо истинод ба Федератсияи футболи Тоҷикистон иттилоъ медиҳад.

Дастаи футболи «Истиқлол»-и  шаҳри Душанбе нисбат ба соли гузашта дар ин раддабандӣ 13 зина боло рафтааст, ки он замон охири моҳи ноябр дар ҷои 54-ум қарор гирифта буд. Тибқи нишондиҳандаҳои моҳи октябри соли 2020, барандаи дукаратаи Ҷоми КФО дар маҷмӯъ 29,77 имтиёз дошта, дар ин рейтинг зинаи 41-умро гирифтааст. Дар маҷмӯъ, ба ин раддабандӣ 144 дастаи Осиё шомил шудаанд. Дастаи дигари   Тоҷикистон – «Хуҷанд»-и шаҳри Хуҷанд бо 11,50 хол дар ҷои 84-ум қарор дорад.

Миёни дастаҳои  Осиёи Марказӣ ҷойи баландтарин ба  дастаи «Локомотив»-и шаҳри  Тошканд тааллуқ дорад, ки бо 36,07 хол дар ҷойи 27-ум қарор гирифтааст. Панҷгонаи беҳтарин дастаҳои Осиё аз ин қабиланд- Кашима Антлерс (Япония, ҷои 1-ум, 100,79 хол), Ал-Ҳилол (Арабистони Саудӣ, ҷои 2-юм, 97,91 имтиёз), Шанхай SIPG (Чин, ҷои 3, 96.00 хол), «Ал-Дуҳайл» (Қатар, ҷои 4-ум, 87.91), Гуанчжоу Эвергранд (Чин, ҷои 5, 86.00 хол).