Тартиби ягонаи ҷуброни хароҷоти шахсони алоҳидаи имтиёздор барои истифода аз нақлиёти мусофирбар омода мешавад

Ноябрь 3, 2020 13:40

ДУШАНБЕ, 03.11.2020 /АМИТ «Ховар»/. Вакилони Маҷлиси намояндагони Маҷлиси Олии Ҷумҳурии Тоҷикистон 28 октябр дар ҷаласаи навбатии иҷлосияи дуюми Маҷлиси намояндагони Маҷлиси Олии Ҷумҳурии Тоҷикистон, даъвати шашум, таҳти раёсати Раиси Маҷлиси намояндагони Маҷлиси Олии Ҷумҳурии Тоҷикистон Маҳмадтоир Зокирзода ба якчанд қонуни Ҷумҳурии Тоҷикистон тағйиру иловаҳо ворид намуданд.

Дар ҷаласа вакилон лоиҳаи якчанд қонунҳои Ҷумҳурии Тоҷикистонро муҳокима ва аз рӯи ҳамаи масъалаҳои баррасишуда қарорҳои дахлдор қабул намуданд. Дар иҷлосия дар баробари масъулини дигар ниҳодҳои дахлдор, аз ҷумла  Вазири нақлиёти Ҷумҳурии Тоҷикистон Азим Иброҳим низ сухан гуфт.

Вазири нақлиёти мамлакат Азим Иброҳим  дар  хусуси лоиҳаи санадҳои қонунгузорӣ оид ба ворид намудани тағйиру илова ба қонунҳои конститутсионӣ, Кодекси гумрук ва баъзе  қонунҳои Ҷумҳурии Тоҷикистон, ки бо ташаббуси қонунгузорӣ аз ҷониби Ҳукумати Ҷумҳурии Тоҷикистон пешниҳод гардидаанд, баромад намуд. Аз ҷумла, зикр кард, ки бо дастгирии бевоситаи Асосгузори сулҳу ваҳдати миллӣ- Пешвои миллат, Президенти Ҷумҳурии Тоҷикистон, Ҷаноби Олӣ муҳтарам Эмомалӣ Раҳмон ва ташаббуси Раиси шаҳри Душанбе, Раиси Маҷлиси миллии Маҷлиси Олии Ҷумҳурии Тоҷикистон муҳтарам Рустами Эмомалӣ ба рушди нақлиёти мусофирбари шаҳри Душанбе диққати махсус дода шуда, дар баробари ба истифода додани автобусу троллейбусҳои нави замонавӣ  низоми электронии пардохти роҳкиро ба роҳ монда шудааст. Ҳамзамон бо истифода аз ин таҷриба низоми электронии пардохти роҳкиро дар шаҳрҳои Хуҷанд ва Бохтар низ пешбинӣ шудааст.

Вазир ҳамчунин иброз дошт, ки имрӯз барои як зумра табақаи гуногун  барои истифода аз нақлиёти ҷамъиятӣ имтиёз муқаррар шудааст. Ин ғамхориҳои Пешвои муаззами миллат   нисбат ба маъюбон, кӯдакон, собиқадорон, вакилони мардумӣ ва мақомоти ҳифзи ҳуқуқ мебошад.

Бо назардошти ин ва бо мақсади муайян намудани механизми ягонаи пӯшонидани хароҷоти интиқолдиҳандагон барои хизматрасонӣ ба шахсони имтиёздошта зарурати қабули Тартиби ягонаи ҷуброни хароҷоти шахсони алоҳидаи имтиёздор барои истифода аз нақлиёти мусофирбари истифодаи умум ба миён омад.

Бо ин мақсад Вазорати нақлиёти Ҷумҳурии Тоҷикистон дар доираи гурӯҳи кории байниидоравӣ барои фароҳам овардани заминаи ҳуқуқӣ ҷиҳати қабули Тартиби ягона ба якчанд санадҳои меъёрии ҳуқуқӣ тағйиру иловаҳои дахлдор пешниҳод намудааст, — гуфт вазир ва чанд Кодекс, қонунҳои конститутсионӣ ва қонунҳои ҷумҳуриро номбар кард.

Мавриди зикр аст, ки ба ҳамаи қонунҳои амалкунанда  танҳо ҷумлаи “Тартиби пӯшонидани хароҷот барои истифодаи ройгон аз хизматрасонии нақлиётиро Ҳукумати Ҷумҳурии Тоҷикистон муайян менамояд”  дар шакли якхела илова шудааст,- гуфт Азим Иброҳим.

Ҳамчунин мавсуф зикр намуд, ки баъд аз қабули лоиҳаҳо Тартиби ягонаи ҷуброни хароҷоти шахсони алоҳидаи имтиёздор барои истифода аз нақлиёти мусофирбари истифодаи умум, ки масъалаҳои пешниҳоди хизматрасониҳоро ба категорияи шахсони  имтиёздор ба танзим медарорад, таҳия ва барои тасдиқ ба Ҳукумати Ҷумҳурии Тоҷикистон пешниҳод мегардад, ки корҳо дар ин самт аллакай оғоз ёфтаанд.

 

АКС аз Вазорати нақлиёти ҶТ

Ноябрь 3, 2020 13:40

Хабарҳои дигари ин бахш

Дар Женева ҳамкорӣ байни Тоҷикистон ва Созмони байналмилалии меҳнат баррасӣ гардид
То соли 2028 ба ҳама шаклҳои бадтарини меҳнати кӯдакон дар Тоҷикистон хотима дода мешавад
Муовини Сарвазир бо рафти корҳои сохтмонии манзилҳои зист барои оилаҳои аз заминҷунбӣ зарардидаи ноҳияи Рашт шинос шуд
Барои дар тобистон ба бемории дарунравӣ гирифтор нашудани кӯдакон чӣ бояд кард?
Даври сеюми Озмуни ҷумҳуриявии «Тараннуми Ватан» баргузор мегардад
Беш аз 190 ҳазор нафар наврасони вилояти Хатлон ба истироҳатгоҳҳо фаро гирифта мешаванд
«ТОБИСТОН-2025». Дар Тоҷикистон беш аз 250 ҳазор кӯдакону наврасон ба истироҳат фаро гирифта мешаванд
РӮЗИ ҶАҲОНИИ ЯХМОС. Чаро ин ширинии яхбастаро аз ҳама зиёд кӯдакон дӯст медоранд?
ҒИЗОИ СОЛИМ. Ҷаҳон Азонов: «Истеъмоли нодуруст ва аз меъёр зиёди ғизо давомнокии умрро кӯтоҳ мекунад»
Дар Бохтар бинои нави Беморхонаи бемориҳои дил ва маркази эндокринология сохта мешавад
САРФАКОРӢ — БАРАКАТИ ЗИНДАГӢ. Ба миқдори сари сӯзан сарфа кардани зан баракатро дар хонадон дучанд меафзояд
ҚОНУНИ ТАНЗИМ — НАМУНА БАРОИ КИШВАРҲОИ МИНТАҚА. Дар давраи амали ин қонуни миллӣ беш аз 12 миллиард сомонӣ сарфа шудааст