ҶАБҲАИ БУЗУРГИ СОЗАНДАГӢ ДАР ШАҲРУ ДЕҲОТИ ТОҶИКИСТОН. Дар деҳаи Гармчашмаи Ванҷ муассисаи таҳсилоти ибтидоӣ ва хати оби нӯшокӣ ба истифода дода шуданд

ДУШАНБЕ, 10.12.2020 /АМИТ «Ховар»/. Дар доираи омодагиҳо ба ҷашни 30-юмин солгарди Истиқлоли давлатӣ бо дастгирии  мақомоти маҳаллӣ ва шарикон дар деҳаи Гармчашмаи Ҷамоати деҳоти Рованди ноҳияи Ванҷ  хати оби нӯшокӣ мавриди баҳрабардорӣ қарор дода шуд. Ин имкон медиҳад сокинони деҳаи Гармчашма, ки дорои 57 хоҷагӣ мебошад, пурра бо оби ошомидании аз лиҳози  санитарӣ тоза таъмин гарданд, зеро 59 нуқтаи оби нӯшокии ҷавобгӯ ба меъёрҳои замони муосир мавриди баҳрабардории мардуми ин деҳа қарор гирифт.

Ҳамчунин бо дастгирии мақомоти маҳаллӣ  ва шарикони рушд муассисаи таҳсилоти ибтидоию умумии №29 дорои 4 синфхонаи таълимӣ барои 20 хонанда ва хати оби нӯшокӣ  дар деҳаи Равгадаи Ҷамоати деҳоти Техарв бо дарозии 3 км ба истифода дода шуданд.

Имрӯзҳо бо дастгирии пайвастаи Ҳукумати мамлакат симои маркази ноҳияи Ванҷ  ба куллӣ дигаргун гардида, иншооти гуногун мавриди баҳрабардорӣ қарор дода мешаванд. Сокинони ноҳияи Ванҷ, аз ҷумла соҳибкорон тадбирҳоро бахшида ба истиқболи сазовори 30-солагии Истиқлоли давлатии Ҷумҳурии Тоҷикистон амалӣ намуда истодаанд.

Аҳли заҳмати ноҳияи Ванҷ бо шукргузорӣ аз сулҳу субот ва эълон гардидани Солҳои рушди деҳот, сайёҳӣ ва ҳунарҳои мардумӣ иброз доштанд, ки ҷиҳати амалӣ намудани ҳадафҳои Ҳукумати ҷумҳурӣ оид ба бунёдкорию созандагӣ дар рушди ноҳия саҳми сазовор мегузоранд.