Дар Донишгоҳи давлатии Данғара оид ба пешгирии бемории ВНМО конфронси таълимӣ доир шуд

ДУШАНБЕ, 01.12.2020. /АМИТ «Ховар»/. 1 декабр дар бастагӣ ба Рӯзи умумиҷаҳонии мубориза бо Вируси норасоии масунияти одам (ВНМО -ВИЧ/СПИД)  ва бо мақсади беҳтар намудани сатҳи маълумотнокии донишҷӯён оид ба бемории  ВНМО дар Донишгоҳи давлатии Данғара дар мавзӯи «Вусъат бахшидани чораҳо барои решакан намудани ВНМО» бо иштироки мутахассисони соҳа Конфронси таълимии донишҷӯён баргузор гардид.

Дар ин бора  ёвари ректор ва мудири бахши  робита бо фазои иттилоотии Донишгоҳи давлатии Данғара Муҳаммад  Шораҳимзода ба АМИТ «Ховар» хабар дод.

Роҳбарони донишгоҳи мазкур зикр намуданд, ки  мақсад аз  баргузории чорабиниҳои гуногуни оммавӣ бори дигар ба аҳолии ҷаҳон расонидани маълумот оид ба ин беморӣ ва сарҷамъ намудани ҳамаи қувваҳо бар зидди он мебошад.  Дар Ҷумҳурии Тоҷикистон низ ҳамасола бахшида ба ин рӯз чорабиниҳои гуногун баргузор карда мешаванд, аз ҷумла ҷамъомаду вохӯриҳо бо мутахассисон, маълумот тавассути воситаҳои ахбори умум, ҳафтаи тестгузаронӣ (санҷиши тестӣ барои муайян намудани сироятнокӣ).

Инчунин гуфта шуд, ки бо қарори Ҳукумати Ҷумҳурии Тоҷикистон аз 30 октябри соли 2010 “Барнома оид ба муқовимат бо эпидемияи Вируси норасоии масунияти одам ва бемории пайдошудаи норасоии масуният дар Ҷумҳурии Тоҷикистон” тасдиқ гардидааст.  Самтҳои асосии стратегии Барномаи мазкур, пеш аз ҳама, ба ташкил намудани заминаи ҳуқуқӣ, ки ба таъмини дастрасии умумӣ ба хизматрасониҳои пешгирӣ, табобат, нигоҳубин ва дастгирӣ мусоидат менамоянд, равона гардидаанд.

Дар кори конфронс мутахассисони соҳа ва донишҷӯён оид ба бемории ВНМО маърӯза намуда,  ҳамчунин   видеофилм аз ҳаёти шахси ба ин беморӣ мубталошуда намоиш дода шуд.

Ба гуфтаи мутахассисони соҳа, пӯшида нест, ки ВНМО (СПИД)- ин зинаи охирини ВИЧ мебошад. Беморӣ, ки ҳамчун аломати норасоии масъунияти бадан муайян карда мешавад, аз аввали солҳои 80-и асри XX маълум аст. Имрӯзҳо тибқи маълумоти СММ,  ҳар рӯз дар ҷаҳон 16 ҳазор нафар аз Вируси норасоии масъунияти бадан сироят меёбанд, ки тақрибан 50%-ро ҷавонони синни аз 14 то 20 ташкил медиҳанд. Аз рӯзи пайдо шудани ин беморӣ дар ҷаҳон тақрибан  60  млн нафар одамон ба он сироят шуда, 20 млн нафари онҳо ба ҳалокат расидаанд, ки ин хеле ташвишовар аст.

Ҳар инсон бояд  худро аз хатари сироят ёфтан аз ин бемориҳо ва вирусҳои ҳалокатовар ҳифз кунад.