Дар ноҳияи Ҷалолиддини Балхӣ ба оилаи Ҳакимовҳо, ки имкониятҳои ҷисмонии падар ва фарзандон маҳдуд мебошанд, кумак расонида шуд

Декабрь 31, 2020 11:31

ДУШАНБЕ, 31.12.2020 /АМИТ «Ховар»/. Дар арафаи Соли нави мелодӣ  Раиси вилояти Хатлон Қурбон Ҳакимзода бо мақсади аёдати оилаи Ҳакимовҳо, ки имкониятҳои ҷисмонии падар ва фарзандони оила маҳдуд мебошанд, ба ноҳияи Ҷалолиддини Балхӣ сафар намуда, ба  ҳамаи фарзанди ин оила сарулибоси гарми зимистона ва шириниҳои солинавӣ, кумаки пулӣ, маводи ғизоӣ, аз ҷумла орду биринҷ, равған, картошкаю пиёз ва ғайра дастрас намуд. Инчунин дар асоси дархости фарзандони ин оила, бо дастури раиси вилоят барои Рамазону Нозанин катҳои хоб, барои Сабрина ҷевони либос ва барои Шукронаю Сарвиноз планшетҳо тақдим карда шуд.

Тавре аз шуъбаи иттилоотию таҳлилии дастгоҳи раиси вилояти Хатлон хабар доданд,  оилаи Ҳакимовҳо дар деҳаи Гагарини Ҷамоати деҳоти «Ҳалевард»-и ноҳияи Ҷалолиддини Балхӣ дар ошёнаи якуми бинои истиқоматӣ, дар хонаи иборат аз се ҳуҷра зиндагӣ менамоянд. Сардори оила Орзу Ҳакимов 40 сол ва ҳамсараш Умеда Шомаҳмудова 35 сол дорад. Фарзанди калонии оила Рамазон 17-сола ва хурдиаш Моҳшариф яксолаанд. Аъзои оилаи мазкур, ба истиснои модари фарзандон Умеда Шомаҳмудова  ҳамагӣ қади паст доранд. Писарашон Рамазон Ҳакимов маъюб буда, бо аробача ҳаракат мекунад.  Модари хонадон дар бозори марказии ноҳияи Ҷалолиддини Балхӣ ба фурӯши либосворӣ машғул буда, чор нафар фарзандонашон дар муассисаи таълимии таҳсилоти миёнаи умумии №2 таҳсил менамоянд. Ин оила дар қайди шуъбаи хизматрасонии иҷтимоӣ дар хонаи назди мақомоти иҷроияи маҳаллии ҳокимияти давлатии ноҳия буда, мунтазам ба онҳо аз тарафи мақомоти давлатӣ ва шахсони саховатпешаи Ҷамоати деҳоти «Ҳалевард» кумак расонида мешавад.

Раиси вилоят Қурбон Ҳакимзода зимни суҳбат бо фарзандони хонавода Сабрина, Сарвиноз ва Нозанин ба дониши онҳо баҳои баланд дода, онҳоро ба таҳсили хуб, мутолиаи китобҳо ва омӯзиши ҳунарҳо ташвиқ намуда, иброз дошт, ки «Пешвои миллат муҳтарам Эмомалӣ Раҳмон ҳамеша ба қишри эҳтиёҷманди аҳолӣ таваҷҷуҳу ғамхорӣ зоҳир мекунанд ва давлат барои таъмини шароити мусоид ва арзандаи зисти ҳамаи табақаҳои аҳолӣ, махсусан маъюбону дардмандон ҳамаҷониба тадбирандешӣ мекунанд».

Раиси вилояти Хатлон дар пайравӣ ба  ташаббуси инсондӯстонаю хайрхоҳонаи Пешвои миллат муҳтарам Эмомалӣ Раҳмон ба аёдати бошандагони Маркази ҷумҳуриявии тавонбахшӣ ва будубоши пиронсолону маъюбон дар ноҳияи Кӯшониён  рафта,  бо вазъи будубош, таъминот ва табобати маъюбон ва пиронсолони ин марказ  шинос гардид. Ҳамчунин шаст нафар бошандагони  ин муассиса дар арафаи соли нави мелодӣ соҳиби туҳфаҳои солинавӣ гардиданд.

Тибқи дархости бошандагони марказ, бо дастури раиси вилоят ба китобхонаи муассиса имрӯз беш аз 50 адад адабиёти тозанашри бадеию таърихӣ тақдим гардида, дар ояндаи наздик боз китобҳои бадеӣ ва махсус (барои нобиноён) дастрас карда мешавад.

Раиси вилоят Қурбон Ҳакимзода зимни шиносоӣ аз ҳуҷраҳои зисти чанде аз бошандагон бо онҳо суҳбати самимӣ анҷом дода, аз вазъи саломатӣ ва шароити нигоҳубинашон пурсон шуд.

Декабрь 31, 2020 11:31

Хабарҳои дигари ин бахш

Огоҳии Кумитаи ҳолатҳои фавқулодда аз ҳавои сарди шабона дар ВМКБ
Дар доираи татбиқи лоиҳаи «Тақвияти таҳсилоти касбӣ-техникӣ ва омӯзиш» семинари амалӣ доир гардид
Вазорати меҳнат, муҳоҷират ва шуғли аҳолӣ соли 2021 дар тамоми шаҳру ноҳияҳо ярмаркаҳои ҷойи кор ташкил мекунад
КИ ҲХДТ дар Суғд қариб ба 900 оилаи ниёзманд беш аз 22 тонна ангишт тақсим намуд
Шуъбаи наҷоти беморхонаи Ҳисор бо таҷҳизоти тиббии замонавӣ муҷаҳҳаз гардонида шуд
Замимаи мобилии «Роҳнамои муҳоҷир» фаъол гардид
Аз оғози соли 2021 музди меҳнати кормандони Донишгоҳи давлатии тиҷорати Тоҷикистон 5 фоиз зиёд мешавад
АГЕНТИИ ОБУҲАВОШИНОСӢ: Даҳаи дуюми моҳи январ дар Тоҷикистон ҳаво асосан бебориш мешавад
САРДИҲОИ ЗИМИСТОН АБАДӢ НЕСТАНД. Ба зудӣ онҳо мераванд ва ҷойро барои рӯзҳои гарм холӣ мекунанд
Тоҷикистон ва Япония дар самти пешгирии бемориҳои сироятии ба воситаи иммунизатсия идорашаванда ҳамкории зич ба роҳ мемонанд
«Мо модарон, ба аёдати сарбозони Ватан меравем!».Таҳти ин унвон дар Бохтар вохӯрӣ доир гардид
Агентии обуҳавошиносӣ: Шабонарӯзи наздик дар бештари ноҳияҳои ҷумҳурӣ фаромадани туман ва резиши қирав боқӣ мемонад