Дар чанд рӯзи охир дар ноҳияи Ҳамадонӣ 750 бех ниҳоли дарахтони ҳамешасабз ва сояафкан шинонида шуд

ДУШАНБЕ, 26.12.2020/АМИТ «Ховар»/. Имсол мувофиқи дурнамо дар ноҳияи Мир Саид Алии Ҳамадонӣ  шинонидани бист ҳазор бех ниҳолҳои гуногун ба нақша гирифта шудааст. Сокинони ноҳияи дар чанд рӯзи охир дар ҳудуди ноҳия  беш аз 750 бех ниҳоли дарахтони ҳамешасабзу сояафкан, аз ҷумла арча шинониданд.

Зимни маъракаи ободонӣ бо иштироки сокинони маҳал дар деҳаи Гулободи ноҳияи   Ҳамадонӣ -дар ду шафати   шоҳроҳи дорои аҳамияти байналмилалӣ ниҳоли дарахтони ҳамешасабз ва сояафкан шинонида шуд. Ба ҷараёни корҳои ниҳолшинонӣ тамоми кормандони ташкилоту муассисаҳои ноҳиявӣ ҷалб гардида, саҳми худро дар корҳои ободонӣ гузоштанд.

Мавриди зикр аст, ки  бо ибтикори Мақомоти иҷроияи ҳокимияти давлатии ноҳияи  Мир Саид Алии Ҳамадонӣ  аз нимаи аввали моҳи декабр   бо  истифода аз обу ҳавои мусоид маъракаи ниҳолшинонӣ ва сабзазоркунӣ аз даромадгоҳи ноҳия бо шинонидани ниҳолҳо дар ду паҳлӯи шоҳроҳ оғоз гардид.

Иқлими ноҳияи Ҳамадонӣ гарм буда, сабзонидани ниҳолҳо хеле мушкил аст. Аз ин рӯ ҳар ниҳол бо тавсияи олимони соҳа ва риояи қоидаҳои агротехникӣ шинонида мешавад. Барои ҳар ниҳол дар паҳлӯи роҳ дар масофаи муайян бо истифода аз техника чуқурӣ канда, аз дигар мавзеъ хоку пору меоранд ва ба он нурии минералӣ ҳамроҳ намуда, сипас ниҳолро мешинонанд. Масъулин ба шинонидани ҳар  ниҳол диққати ҷиддӣ медиҳанд ва ҳатман атрофи ниҳолҳоро нарм карда, об мерезанд. Ҳар қадар, ки намӣ зиёд бошад, нурии минералӣ ҳал шуда, ба сабзиши ояндаи ниҳолҳо кумак мерасонад.

Тавре аз Кумитаи ҳифзи муҳити зисти назди  Ҳукумати ҷумҳурӣ иттилоъ доданд, имрӯзҳо дар партави дастури Пешвои  миллат муҳтарам Эмомалӣ Раҳмон бо мақсади сабзу хуррам гардонидани маҳали зист бо истифода аз ҳавои мусоид дар шаҳру ноҳияҳои мамлакат маъракаи ниҳолшинонӣ  вусъат меёбад.

Бояд тазаккур дод, ки дар маъракаи ниҳолшинонӣ саҳми бахши ҳифзи муҳити зист ва хоҷагии ҷангали ноҳия ҳам назаррас аст.