Дар ноҳияи Данғара бахшида ба ҷашни Сада намоиши идона баргузор гардид

ДУШАНБЕ, 21.01.2021 /АМИТ «Ховар»/.  Имрӯз бахшида ба ҷашни таърихии Сада дар ноҳияи Данғараи вилояти Хатлон бо иштироки раиси вилоят, намояндагони мақомоти иҷроия, кишоварзон ва сокинони ноҳия намоиши идона баргузор гардид. Дар он анвои гуногуни хӯрокҳои миллӣ ба маърази тамошо гузошта шуд.

Тавре аз шуъбаи иттилоотию таҳлилии дастгоҳи раиси вилояти Хатлон иттилоъ доданд, дар ин рӯз Қурбон Ҳакимзода ба кишти картошка дар замини таҷрибавии Донишгоҳи давлатии Данғара оғоз бахшид.

Раиси вилоят сокинони ноҳия, хусусан деҳқонони меҳнатдӯстро ба муносибати ин ҷашни бостонӣ шодбош гуфта, иброз дошт, ки “ҷашни Сада ҳамчун ойини бостонӣ мероси арзишманди аҷдодони шарафмандамон буда, дар тӯли таърих ва имрӯз ба сифати яке аз рукнҳои муҳими худшиносиву худогоҳии мардуми мо ба ҳисоб меравад. Сада дар фарҳангу тамаддуни халқи тоҷик ҷойгоҳи хосса дорад. Гузаштагони мо анъанаву суннатҳои онро дар хотираи таърихии хеш чун дурри гаронбаҳои маънавӣ ҳифз карда, то ба наслҳои имрӯза расонидаанд”.

Ёдовар мешавем, ки Сада ҷашни қадимию суннатии мардуми  тоҷик ба шумор рафта, аз гузаштагонамон мерос мондааст.  Ин ҷашн бо шумораи сад (сад фарзанди Қаюмарс ё панҷоҳ шабу панҷоҳ рӯз) алоқаманд мебошад. Ба андешаи олимон, ин ҷашн ба он хотир Сада ном гирифтааст, ки аз 10 моҳи Баҳман то омадани Наврӯз 50 шабу 50 рӯзро фаро мегирад.